“Aspides” missiyası Qırmızı dənizdə 260 gəminin mühafizə və müşayiət tələb etdiyini açıqlayıb
Qahirə, 30 sentyabr, AZƏRTAC
Husilərin Qırmızı dənizdə kommersiya gəmilərinə hücumlarının başlanmasından sonra 260 gəmi mühafizə və müşayiət üçün Avropa İttifaqının Qırmızı dənizdə ticarət gəmilərini müşayiət edən “Aspides” missiyasına müraciət edib.
AZƏRTAC “əl-Hədəs”ə istinadla xəbər verir ki, bunu “Aspides” missiyasının nümayəndəsi bildirib. O əlavə edib ki, hər ay Bab əl-Məndəb boğazı ərazisində təxminən 130 gəmi müşayiət üçün müraciət edir. Onun sözlərinə görə, missiya Bab əl-Məndəb boğazı və Qırmızı dənizdə təhlükəsizlik vəziyyətini yaxından izləyir.
Nümayəndə qeyd edib ki, “Aspides” fəaliyyət göstərdiyi ərazidə təhlükəsizlik mühitini davamlı qiymətləndirir və beynəlxalq hüquqa uyğun olaraq, missiyanın müəyyən edilmiş mandatı çərçivəsində naviqasiya azadlığının təmin edilməsinə hazırdır.
Məlumata görə, “Aspides” missiyasının 2024-cü ildə fəaliyyətə başlamasından etibarən ümumilikdə 2640 gəmi mühafizə və müşayiət üçün müraciət edib.
Bölmənin digər xəbərləri
