Yeni zelandiyalı velosipedçi: "Bakı-Xankəndi" yarışı yaddaşımda xoş xatirə kimi qalacaq
Xankəndi, 14 may, AZƏRTAC
Bu həftənin əvvəlindən yarışa ciddi şəkildə hazırlaşmağa başladıq.
AZƏRTAC xəbər verir ki, bu sözləri "Bakı–Xankəndi" Azərbaycan beynəlxalq velosiped yarışının IV mərhələsinin qalibi olan İspaniyanın "Burqos" komandasının üzvü Coş Barnett jurnalistlərə açıqlamasında deyib.
Tərtərdən Xankəndiyə qədər 181,5 kilometr məsafəni hamıdan tez qət edən Yeni zelandiyalı velosipedçi nəticəyə görə xoşbəxt olduğunu bildirib: "Komanda olaraq yaxşı hazırlaşırdıq. Bu mərhələnin son 50 kilometr məsafəsi çox ağır oldu. Çünki yoxuşlu yollar var idi. Komanda yoldaşlarımızla bir-birimizi önə keçirməyə çalışırdıq. Bu da bizdə alındı. Digər komanda üzvlərimiz də bu qələbədə böyük pay sahibi oldular".
O, yarışı hər zaman xoş xatirələrlə xatırlayacağını söyləyib: "Mən üç ildir velosiped idmanı ilə məşğul oluram. Bu, peşəkar səviyyədə ilk qələbəm oldu. Yarış yaddaşımda xoş xatirə kimi qalacaq".
Qeyd edək ki, ilk mərhələdə Çinin "Li-Ninq Star" komandasının belaruslu üzvü Aleksey Şnirko, II və III mərhələdə isə müvafiq olaraq, Qazaxıstanın "XDS Astana" komandasının üzvləri Yevgeni Fyodorov və Qleb Suritsa 1-ci yeri tutublar. İtaliyanın "Bardiani" komandasının üzvü Marko Manenti isə IV etapın qalibi olub.
Beynəlxalq Velosipedçilər İttifaqının (UCI) 2.1 kateqoriyalı yarışında dünyanın 20 ölkəsini təmsil edən 24 komanda mübarizə aparıb.
Müxbir - Cavid Əliyev
Bölmənin digər xəbərləri
