Ukrayna Baş nazirinin müavini WUF13-ün əhəmiyyətini qeyd edib – EKSKLÜZİV
Kiyev, 14 may, AZƏRTAC
Ümumdünya Şəhərsalma Forumu (WUF) hazırda BMT-nin şəhərlərin, icmaların, mənzil siyasətinin və infrastrukturun gələcəyinə dair vizyonu formalaşdırmaq üçün əsas qlobal platformalarından biridir.
Bu barədə məxsusi olaraq AZƏRTAC-a Ukrayna Baş nazirinin yenidənqurma üzrə müavini və icmalar və ərazilərin inkişafı naziri Aleksey Kuleba bildirib.
O qeyd edib: “Bu, əslində, dünyanın XXI əsrin əsas problemlərinə - urbanizasiya, mənzil böhranı, miqrasiya, iqlim dəyişikliyi, müharibənin nəticələri və şəhər dayanıqlığına cavab axtardığı bir platformadır. Forum Ukrayna üçün xüsusi əhəmiyyətə malikdir, çünki bu gün biz şəhər inkişafının yalnız nəzəri deyil, həm də praktik olaraq - tammiqyaslı müharibə kontekstində bərpasından danışırıq. Ukrayna hazırda unikal təcrübə yaşayır. Biz həm ölkəni müdafiə edirik, həm də icmaları yenidən qurur, infrastrukturu modernləşdirir və islahatlar həyata keçiririk”.
Baş nazirin müavinin sözlərinə görə, dünya miqyasında əksər yenilənmə modelləri müharibə bitdikdən sonra tətbiq edilib.
O əlavə edib: “Ukrayna effektiv şəkildə yeni bir yanaşma ilə müharibə zamanı yenidənqurmanı inkişaf etdirir. Bu, hazırda beynəlxalq ictimaiyyət üçün vacib təcrübəyə çevrilir. Müharibə göstərdi ki, müasir şəhər artıq yalnız memarlıq və ya iqtisadiyyatla bağlı deyil. Burada dayanıqlılıq daha mühümdür. Bu, həmçinin cəmiyyətin böhranlar, hücumlar, elektrik kəsintiləri və daimi təhdidlər zamanı fəaliyyət göstərmək qabiliyyəti ilə bağlıdır. Biz mərkəzsizləşdirmənin, güclü yerli idarəetmənin, rəqəmsal xidmətlərin, davamlı enerjinin, müasir logistikanın, vacib infrastrukturun qorunmasının və ən əsası, icmalar daxilində insanların və etimadın vacib olduğunu gördük”. Kuleba diqqətə çatdırıb ki, Ukrayna bu gün təkcə dağıntıların ağrılı təcrübəsini deyil, həm də konkret həll yollarını paylaşa bilər.
“Dünya Bankı, Avropa Komissiyası, BMT və Ukrayna hökumətinin RDNA5 qiymətləndirməsinə görə, 2025-ci ilin sonuna qədər Ukraynanın mənzil sektoruna dəyən zərər 61 milyard dolları keçəcək. Ölkənin mənzil fondunun təxminən 14 faizi qismən və ya tamamilə dağıdılıb. Bu, 338 mindən çox fərdi ev, 41 mindən çox mənzil binası və təxminən 900 yataqxana deməkdir. Artıq 293 mindən çox yaşayış obyekti “Zədələnmiş və məhv edilmiş əmlak reyestri”nə əlavə edilib. Eyni zamanda, Ukraynada rəsmi olaraq 4,6 milyondan çox məcburi köçkün qeydiyyata alınıb. Buna görə də dünyanın belə beynəlxalq platformalarda bu böhranın mənbəyini aydın şəkildə anlaması bizim üçün vacibdir”, - deyə nazir vurğulayıb.
Kulebanın sözlərinə görə, müasir şəhərlər təhlükəsizlik, humanitar, iqtisadi, demoqrafik və iqlimlə bağlı qlobal problemlərin mərkəzində yer alır.
“WUF13-ün əhəmiyyəti hökumətləri, beynəlxalq təşkilatları, şəhərləri, maliyyə qurumlarını, müəssisələri və mütəxəssisləri birgə həllər tapmaq üçün bir araya gətirməsindədir. Builki forumun təhlükəsiz və dayanıqlı icmaların təməli kimi mənzil məsələsinə diqqət yetirməsi xüsusilə vacibdir. Bu, Ukrayna üçün son dərəcə aktualdır. Milyonlarla ukraynalı Rusiyanın təcavüzü nəticəsində evlərini itirib. Eyni zamanda, biz artıq mənzil siyasəti və bərpa üçün yeni yanaşmalar - rəqəmsal kompensasiya mexanizmləri, bərpa proqramları, sosial mənzillərin inkişafı, məcburi köçkünləri dəstəkləmək üçün yeni mexanizmlər, köhnəlmiş mənzil fondunun modernləşdirilməsi, dövlət-özəl tərəfdaşlığının inkişafı və enerji səmərəliliyi ilə dayanıqlılıq prinsiplərinin inteqrasiyasını hazırlayırıq”, - deyə Ukrayna Baş nazirinin müavini bildirib.
Nazir qeyd edib ki, dövlət proqramı çərçivəsində təxminən 360.000 insan zədələnmiş və ya dağılmış mənzillərə görə kompensasiya alıb.
“Biz getdikcə daha çox vurğulayırıq ki, bərpa prosesi sadəcə dağıdılmış obyektləri bərpa etməkdən ibarət deyil və daha çox məna kəsb edir. Bu, şəhər mühitinin, yeni infrastrukturun və icmaların inkişafı modelinin ən müasir standartlara uyğun qurulması üzrə yaranan fürsətdir. Ukrayna bu gün bərpa və dayanıqlığa yeni yanaşmaların inkişafı mərkəzinə çevrilir. Buna görə də bu cür qlobal forumlarda iştirak təkcə Ukrayna üçün deyil, həm də yeni risklər və çətinliklər dünyasında gələcəyin şəhərlərinin necə görünməli olduğu barədə beynəlxalq müzakirə baxımından vacibdir. Belə bir qlobal platforma təşkil etdiyinə və Ukraynanı dəstəklədiyinə görə Azərbaycana minnətdarıq. Bu gün beynəlxalq ictimaiyyətin bərpa, icma dayanıqlığı və müharibənin humanitar nəticələrinə diqqət yetirməyə davam etməsi zəruridir”, -deyə Kuleba əlavə edib.
Bölmənin digər xəbərləri
