Ermənistanda işğalçı ideologiyanın yenidən dirçəldilməsi region üçün ciddi risk mənbəyidir - ŞƏRH
Bakı, 14 may, AZƏRTAC
Cənubi Qafqazda yaranmış yeni geosiyasi reallıqlar fonunda Azərbaycan regionda dayanıqlı sülhün əsas təşəbbüskarı və təminatçısı kimi çıxış edir. 44 günlük Vətən müharibəsindən sonra Prezident İlham Əliyevin formalaşdırdığı strateji siyasi xətt göstərdi ki, Azərbaycan artıq yalnız hərbi qələbə qazanan dövlət deyil, eyni zamanda, regionun gələcək təhlükəsizlik arxitekturasını müəyyən edən əsas siyasi aktordur. Məhz bu nöqteyi-nəzərdən yanaşdıqda, Azərbaycanın sülh gündəliyi yalnız ikitərəfli münasibətlərin normallaşdırılmasına deyil, bütövlükdə Cənubi Qafqazda yeni əməkdaşlıq mühitinin formalaşdırılmasına xidmət edir.
Bu sözləri AZƏRTAC-a açıqlamasında politoloq Aytən Qurbanova söyləyib.
O bildirib ki, müharibədən dərhal sonra Azərbaycan Ermənistana sülh müqaviləsi ilə bağlı konkret prinsiplər təqdim etdi. Dövlət sərhədlərinin qarşılıqlı tanınması, ərazi bütövlüyünə hörmət, gələcəkdə bir-birinə qarşı ərazi iddialarından imtina və kommunikasiyaların açılması kimi bu fundamental prinsiplər beynəlxalq hüququn norma və qaydalarına əsaslanır. Azərbaycan dəfələrlə bəyan edib ki, regionda yeni qarşıdurma deyil, məhz sabitlik və iqtisadi inteqrasiya mühiti formalaşdırmaq niyyətindədir. Ermənistan rəhbərliyi də müxtəlif platformalarda Azərbaycanın ərazi bütövlüyünü tanıdığını bəyan edib. Belə olan halda ortaya ciddi sual çıxır ki, əgər sülh prosesi gedirsə və tərəflər bunu ən yüksək səviyyədə ifadə edirsə, onda Ermənistanda Avropa İttifaqı missiyasının saxlanılmasının real məqsədi nədir? Avropa İttifaqının “mülki missiyasının” fəaliyyətinə diqqətlə baxdıqda onun klassik müşahidə mexanizmi çərçivəsindən daha çox siyasi-geostrateji alət funksiyası daşıdığı aydın şəkildə görünür. Missiyanın mövcudluğu isə regionda etimad mühitini gücləndirməkdən daha çox əlavə geosiyasi müdaxilə elementləri yaradır.
"Aİ missiyanın əsas siyasi himayədarı Fransadır. Rəsmi Parisin son illərdə nümayiş etdirdiyi açıq ermənipərəst mövqe artıq diplomatik balans çərçivəsindən çıxaraq birtərəfli siyasi xəttə çevrilib. Fransa Senatında qəbul edilən anti-Azərbaycan qətnamələri, Ermənistana hərbi texnika göndərilməsi, Avropa platformalarında ölkəmizə qarşı davamlı siyasi kampaniyalar bunun açıq göstəricisidir. Əslində bu siyasət müəyyən mənada “binokl diplomatiyası”nın davamıdır. Beləliklə də regionda sülh və etimad yaratmaq iddiası ilə çıxış edən qüvvələrin birtərəfli yanaşması onların həqiqi məqsədlərini ortaya qoyur.
Prezident İlham Əliyev dəfələrlə Azərbaycanın bölgədə yeni təhlükə ocaqlarının yaranmasına imkan verməyəcəyini vurğulayıb. Ermənistan daxilində revanşist qüvvələrin fəallaşması və keçmiş işğalçı ideologiyanın yenidən dirçəldilməsi cəhdləri isə region üçün ciddi risk mənbəyidir.
2020-ci ildə olduğu kimi Azərbaycan bundan sonra da öz təhlükəsizliyinə yönəlmiş istənilən təhdidə qarşı qətiyyətli mövqe nümayiş etdirəcəyini hər zaman açıq və konkret şəkildə ifadə edib",- deyə A.Qurbanova vurğulayıb.
Politoloq əlavə edib ki, 44 günlük Vətən müharibəsində Qarabağ separatizmini idarə edən və onu beynəlxalq manipulyasiya alətinə çevirən qüvvələr ilk dəfə olaraq tarixi məğlubiyyətlə üzləşdilər. Bəzi dairələr bu qələbənin miqyasını hələ də tam dərk etməyə bilərlər. Lakin reallıq ondan ibarətdir ki, Vətən müharibəsi Cənubi Qafqazda təxminən iki əsr ərzində formalaşmış ədalətsiz status-kvonu aradan qaldırdı. Bu gün Azərbaycan regionda diktə olunan deyil, təşəbbüs irəli sürən dövlətdir. Ölkəmiz həm enerji təhlükəsizliyi, həm nəqliyyat-logistika layihələri, həm də regional təhlükəsizlik məsələlərində əsas söz sahibinə çevrilib.
"Ermənistan seçim qarşısındadır. Ya revanşist xəyallardan birdəfəlik imtina edib regional əməkdaşlığa qoşulmalı, ya da xarici güclərin geosiyasi alətinə çevrilərək növbəti tarixi səhvlərlə üzləşməlidir. Cənubi Qafqazda isə davamlı sülhün alternativi yoxdur. Lakin bu sülh yalnız region dövlətlərinin suveren iradəsi və qarşılıqlı hörmət prinsipi əsasında mümkün ola bilər. Xarici müdaxilələr, ikili standartlar və birtərəfli yanaşmalar isə sülhə deyil, yeni qarşıdurma risklərinə xidmət edir. Azərbaycan isə öz prinsipial mövqeyində qətidir. Belə ki, bölgədə təhlükəsizlik, sabitlik və əməkdaşlıq yalnız beynəlxalq hüquqa, ədalətə və qarşılıqlı məsuliyyətə əsaslanan münasibətlər sistemi üzərində qurula bilər",- deyə o vurğulayıb.
Bölmənin digər xəbərləri
