Bişkekdə Ulu Öndərin əziz xatirəsi anılıb
Bakı, 13 dekabr, AZƏRTAC
Dekabrın 12-də Azərbaycan Respublikasının Qırğız Respublikasındakı səfirliyində Azərbaycan xalqının Ümummilli Lideri, dahi şəxsiyyət, dünyaşöhrətli siyasi xadim Heydər Əliyevin vəfatının 19-cu ildönümü ilə əlaqədar tədbir keçirilib.
Səfirlikdən AZƏRTAC-a bildirilib ki, tədbirdə “Azəri” İctimai Birliyinin, “Mərkəzi Asiyanın Tərəqqipərvər Azərbaycanlıları Birliyi”nin rəhbərləri, üzvləri və səfirliyin əməkdaşları iştirak ediblər.
Tədbirin əvvəlində Ulu Öndərin səfirliyin inzibati binasında yerləşən büstü önünə gül dəstələri düzülüb, xatirəsi bir dəqiqəlik sükutla yad edilib.
Tədbir iştirakçıları qarşısında çıxış edən səfir Lətif Qəndilov qəlbi daim vətən eşqi ilə döyünən, bütün varlığı ilə xalqına bağlı olan, xalqımızı zamanın sərt sınaqlarından yüksək məharətlə çıxaran, hər bir çətin vəziyyətdən ən düzgün çıxış yolu tapan müdrik lider Heydər Əliyevin həyat və fəaliyyətindən ətraflı danışıb.
L.Qəndilov qeyd edib ki, xalqın tələbi ilə ölkə rəhbərliyinə geri qayıdan Heydər Əliyev Azərbaycanda dövlət quruculuğu və iqtisadi layihələrin həyata keçirilməsi məqsədilə 1994-cü ildə Bişkek protokolunu imzalamış və dövlət quruculuğuna başlamışdır. Ölkəmizin iqtisadi potensialını artırmaq və ordu quruculuğunu həyata keçirmək məqsədilə dünyanın aparıcı şirkətləri ilə “Əsrin müqaviləsi”ni imzalamış, Bakı-Tbilisi-Ceyhan boru kəmərinin əsasını qoymuş, qədim ipək yolunun bərpası ilə əlaqədar 1998-ci ildə dünya əhəmiyyətli TRACECA konfransı təşkil etmişdir. Ulu Öndərin gələcəyə hesablanmış planlarını Prezident İlham Əliyev uğurla həyata keçirir, çoxlu sayda - Bakı-Tbilisi-Ceyhan, Bakı-Tbilisi-Ərzurum, Trans-Adriatik boru kəməri, Trans-Anadolu təbii qaz boru kəməri kimi böyük enerji layihələri reallaşdırılıb, Bakı-Tbilisi-Qars dəmir yolu çəkilib və Azərbaycan dünyanın bir parçasına çevrilib, ölkəmizin iqtisadiyyatına böyük həcmdə investisiya cəlb edilib. Bununla da ölkəmizin siyasi, iqtisadi təhlükəsizliyi təmin olunub. Dövlətimizin başçısı İlham Əliyevin rəhbərliyi ilə Azərbaycanda güclü iqtisadiyyatın inkişafı təmin edilib, müasir ordu qurulub, haqlı mövqeyimiz dünyaya çatdırılıb. Qarabağın Azərbaycanın tərkib hissəsi olduğu dünya ölkələri tərəfindən qəbul edilib. Məhz görülən bu kimi titanik işlərin nəticəsində Azərbaycan 44 günlük müharibədə öz tarixi torpaqlarını erməni işğalından azad edə bilib.
L.Qəndilov vurğulayıb ki, Ulu Öndər Heydər Əliyev tərəfindən vaxtilə düzgün müəyyənləşdirilmiş enerji və nəqliyyat strategiyası bu gün Azərbaycanı dünya iqtisadiyyatına inteqrə etmiş, ölkəmiz Şimal-Cənub, Şərq-Qərb istiqamətlərində mühüm enerji və logistika mərkəzinə çevrilib.
Səfir Ulu Öndərin mükəmməl siyasətini yeni müstəvidə, dövrün tələblərinə uyğun şəkildə uğurla davam etdirən dövlətimizin başçısı İlham Əliyevin rəhbərliyi ilə ölkəmizdə görülmüş müstəsna əhəmiyyətli işlərdən, həyata keçirilmiş islahatlardan, bütün sahələrdə əldə olunmuş uğurlardan söz açıb.
“Azəri” İctimai Birliyinin rəhbəri Əzizağa Əliyev öz çıxışında Ulu Öndərin Azərbaycan tarixindəki və beynəlxalq arenadakı rolundan, 1970-1980-ci illərdə xalqımız qarşısında xidmətlərindən, hakimiyyətə qayıdışından sonra diaspor təşkilatlarımızın yaradılmasındakı rolundan bəhs edib.
“Azəri” İctimai Birliyinin fəxri prezidenti Akif Alaferdov çıxışında Heydər Əliyevin dünyanın tanınmış siyasətçilərindən biri olduğunu, özündən sonra hakimiyyəti İlham Əliyev kimi böyük bir şəxsə verdiyini qeyd edib və bu gün əldə etdiyimiz nailiyyətlərin bununla bağlı olduğunu bildirib.
Tədbir Ümummilli Lider Heydər Əliyevin həyat və fəaliyyətindən bəhs edən sənədli filmlərin nümayişi ilə başa çatıb.
Bölmənin digər xəbərləri
