BMT-NİN BAŞ KATİBLİYİNƏ NAMİZƏDLƏR ÜZRƏ REYTİNQ SƏSVERMƏSİNİN İKİNCİ DÖVRƏSİ GÖZLƏNİLMƏZ NƏTİCƏ VERMƏDİ

15.09.2006 [19:23]
Çap et
A⁺ A^-

AZƏRTAC İTAR-TASS-a istinadla xəbər verir ki, sentyabrın 14-də BMT Təhlükəsizlik Şurası beynəlxalq birliyin növbəti baş katibi vəzifəsinə namizədlər üzrə reytinq səsverməsinin ikinci dövrəsini keçirmişdir. O, heç bir sürpriz verməmiş və yalnız onu təsdiqləmişdir ki, Cənubi Koreyanın xarici işlər naziri Pan Gi Mun liderliyini davam etdirir və bu vəzifə uğrunda mübarizədə öz mövqeyini möhkəmlətmişdir.

Qeyri-rəsmi məlumata görə, Təhlükəsizlik Şurasının 15 üzvündən 14-ü ona səs vermişdir (birinci dəfə 12 səs). İkinci iddiaçı - BMT baş katibinin müavini, hindistanlı Şaşi Tarur barədə səsvermənin nəticələri, demək olar, dəyişməmişdir - 10 səs. Siyahıda üçüncü yeri əvvəlkitək Tailandın Baş nazirinin müavini Surakiat Satientay tutur, onun ardınca bu günlərdə seçkiqabağı mübarizəyə qoşulan İordaniyanın BMT-dəki daimi nümayəndəsi şahzadə Zaid əl-Hüseyn gəlir. Nəhayət, axırıncı yeri əvvəllər BMT baş katibinin tərksilah məsələləri üzrə müavini olmuş Şri-Lanka diplomatı Cayanta Dhanapala tutur.

BMT dairələrində iordaniyalı diplomatın belə az səs toplamasına diqqət yetirmişlər. Çünki çoxları onu iddiaçılar qrupunda lider hesab edirdilər. Çünki İordaniya kral sülaləsinin 42 yaşlı şahzadəsi çoxtərəfli danışıqlar aparmaq sahəsində yüksək peşə keyfiyyətlərinə malikdir, BMT problemlərinə bələddir və ünsiyyətcildir. Ona ingilislər və amerikalılar da rəğbətlə yanaşırlar.

Ümumiyyətlə, müşahidəçilərin fikrincə, hər hansı namizəd barəsində proqnoz vermək hələ tezdir.

Xatırladaq ki, indiki baş katib Kofi Annanın səlahiyyət müddəti dekabrın 31-də bitir.