BMU-İNHA ikili diplom proqramının II məzun buraxılışı keçirilib
Bakı, 17 iyul, AZƏRTAC
Bakı Mühəndislik Universiteti (BMU) ilə Koreyanın İNHA Universiteti arasında icra olunan tam dövlət təqaüdlü ikili diplom proqramının (BMU-İNHA İDP) 2024-2025-ci tədris ili məzunları üçün buraxılış mərasimi keçirilib.
Elm və Təhsil Nazirliyinin rəhbərliyi, hər iki universitetin rektorları, Koreyanın Azərbaycandakı səfirliyi və KOİCA-nın əməkdaşları, iş adamları, universitetlərin professor-müəllim heyəti, eləcə də məzunların iştirak etdiyi tədbirdə əvvəlcə Ulu Öndər Heydər Əliyev və şəhidlərimizin xatirəsi bir dəqiqəlik sükutla yad olunub, ardınca iki ölkənin Dövlət himnləri səsləndirilib.
Bu barədə AZƏRTAC-a BMU-dan məlumat verilib.
Açılış mərasimində çıxış edən BMU-nun rektoru Yaqub Piriyev İNHA Universiteti ilə icra edilən ikili diplom proqramının ikinci məzun buraxılışının keçirildiyini vurğulayıb. “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı”nın ölkəmizin kadr potensialının güclənməsində mühüm roluna diqqət çəkən rektor dünyanın aparıcı universitetləri ilə birgə 6 beynəlxalq ikili diplom proqramından birinin məhz BMU tərəfindən həyata keçirildiyini universitetin tarixində mühüm hadisə kimi qiymətləndirib. Proqramla bağlı bir sıra statistik rəqəmləri diqqətə çatdıran Yaqub Piriyev Azərbaycan ilə Koreya respublikaları arasındakı əlaqələrə töhfə verən, professor-müəllim heyətinin nəzəri və praktiki biliklərinin təkmilləşməsində, yüksəkixtisaslı kadrların yetişirilməsində müsbət rol oynayan proqrama görə ölkə rəhbərliyinə, Elm və Təhsil Nazirliyinə, proqramın gerçəkləşməsində dəstəyi üçün İNHA Universitetinə minnətdarlıq edib. Məzunların valideynlərini təbrik edən rektor övladlarının uğurlarında onların dəstəyinin əvəzsiz olduğunu deyib. Dörd il ərzində ixtisaslarını yaxşı mənimsəmək üçün çalışan, Koreya dilini öyrənərək, bu ölkədə bilik və bacarıqlarını artıran məzunların Azərbaycan üçün yaxşı mühəndislər olacağına əminliyini ifadə edərək, məzunlara karyeralarında müvəffəqiyyətlər arzulayıb.
Mərasimdə elm və təhsil nazirinin müavini İdris İsayev məzunları təbrik edib, təhsillərini başa vuran gənclərin əldə etdikləri bilik və bacarıqların həyatlarının növbəti mərhələsində onlara böyük dəstək olacağına, yiyələndikləri ixtisaslarla yerli və xarici əmək bazarında tələb edilən sahələrdə uğurlu karyera qura biləcəklərinə əminliyini söyləyib. Ölkəmizdə təhsilin müasir tələblər əsasında inkişafı üçün dövlət səviyyəsində görülən tədbirləri, bir sıra xarici ali təhsil müəssisələri ilə həyata keçirilən ikili diplom proqramlarını vurğulayan nazir müavini bunların insan kapitalının inkişafına yönəlik, gənc nəslin elmi potensialının üzə çıxarılması, beynəlxalq təcrübənin mənimsənilməsi ilə peşəkar kadr kimi formalaşmanın təmin edilməsi, nəticədə ölkəmizə layiqli mütəxəssislər qazandırmaq məqsədi daşıdığını deyib. Ali təhsil müəssisələrinin güclənən beynəlxalq mövqeyinə toxunan İdris İsayev BMU-nu açıqlanan son QS reytinqində ilk minlikdəki yerinə görə təbrik edib, bütövlükdə universitetlərimizin əldə etdiyi nailiyyətləri ölkəmizdə təhsilin inkişafı üçün görülən işlərin nəticəsi kimi qiymətləndirib.
Sonra İNHA Universitetinin rektoru Cho Myeong Voo məzunları təbrik edərək, onların əzm və səyləri sayəsində bu proqramın müsbət nəticələr verdiyini vurğulayıb. İki ölkə arasında təhsil əməkdaşlığının gözəl rəmzinə çevrilən ikili diplom proqramının beynəlxalq səviyyədə kadr hazırlığına uğurla xidmət etdiyini deyən rektor məzunların tədris boyu qazandıqları bilik və təcrübənin onların karyera pilləsində inamla addımlamasına kömək edəcəyinə əminliyini söyləyib.
Koreyanın ölkəmizdəki səfiri Kımqu Kanq isə çıxışında ikili diplom proqramını iki ölkə arasında təhsil əməkdaşlığının nümunəvi göstəricisi adlandırıb. Məzun olmanın son yox, yeni bir başlanğıc sayıldığını deyən səfir gənclərin saysız-hesabsız imkanlarla dolu karyera yolunun çətinliklərini universitetlərin auditoriyasında sahib olduqları yaradıcı düşüncə və mübarizə ruhu ilə dəf edə biləcəklərinə inandığını bildirib.
Sonra proqramda fəallıqları ilə seçilən elektrik mühəndisliyi ixtisasının məzunu Şəhanə Mirəliyeva və inşaat mühəndisliyi ixtisasının məzunu Amani Sultanov çıxış ediblər. Çıxışlarda proqramın onlara iki müxtəlif ölkənin və universitetin tədris sistemini müqayisəli şəkildə öyrənmək, fərqli mühəndislik yanaşmalarını birləşdirərək daha çevik və qlobal düşüncəli mühəndislər kimi yetişmək imkanı yaratdığı vurğulanıb, gənclərin hərtərəfli inkişafına yaradılan şəraitə görə ölkə rəhbərinə təşəkkür ifadə edilib.
Tələbələrin ifasında iki ölkənin milli rəqsləri, eyni zamanda, Xalq artisti Elçin Həşimov və Əməkdar artist Elnur Əhmədovun ifasında muğam parçaları ilə zəngin bədii hissənin ardınca ixtisas birinciləri, sosial-ictimai həyatda fəal iştirak edən məzunlar mükafatlandırılıb. Həmçinin məzunlara diplomlar təqdim olunub.
Tədbir məzunların “papaq atma”sı ilə başa çatıb.
Bölmənin digər xəbərləri
