Böyük Britaniya Rusiya hərbi kəşfiyyatına sanksiyalar tətbiq edib
London, 5 dekabr, AZƏRTAC
Böyük Britaniya hökuməti Rusiyanın hərbi kəşfiyyat agentliyi olan GRU-ya qarşı genişmiqyaslı sanksiyalar tətbiq edib.
AZƏRTAC Britaniya Xarici İşlər Nazirliyinə istinadla xəbər verir ki, yeni tədbirlər 2018-ci ildə Solsberidə baş vermiş hadisələrlə bağlı aparılan araşdırmanın yekun hesabatından sonra elan olunub. Bildirilib ki, Böyük Britaniya GRU-nu tam şəkildə sanksiya siyahısına daxil edib. Rusiyanın Britaniyadakı səfiri Xarici İşlər Nazirliyinə çağırılaraq, Rusiyanın Böyük Britaniyaya qarşı davam edən düşmənçilik fəaliyyətinə görə izahat verməsi tələb edilib.
Hökumətin açıqlamasında bildirilir ki, sanksiyalar, həmçinin GRU üçün çalışan səkkiz kiber hərbi kəşfiyyat zabitini də əhatə edir. Hesabatda qeyd edilir ki, həmin şəxslər Yuliya Skripalı “X-agent” zərərli proqramı ilə hədəf alan kiberhücumlarda və beş il sonra Yuliya və atasını Böyük Britaniya ərazisində öldürməyə cəhd edən əməliyyatda iştirak ediblər. Böyük Britaniya hökuməti bəyan edib ki, Rusiya tərəfindən həyata keçirilən bu cür düşmənçilik fəaliyyətlərinə qarşı sərt və davamlı cavab veriləcək.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
