BP Azərbaycanda potensialın artırılmasına dəstəyini davam etdirir
Bakı, 25 may, AZƏRTAC
“BP Azerbaijan” şirkəti öz tərəfdaşları ilə birlikdə 2011-ci ildə əsasını qoyduğu və 8 il uğurlu fəaliyətdən sonra 2018-ci ildə davamlı və müstəqil idarə olunması üçün Bakı Ali Neft Məktəbinə təhvil verdiyi Layihə İdarəetmə Məktəbinə (LİM) dəstək verməyə davam edir.
Şirkətdən AZƏRTAC-a bildirilib ki, bu dəstəyin və ölkədə yerli imkanların və ümumi potensialın artırılmasına yönəlmiş öhdəliyinin tərkib hissəsi kimi BP Azərbaycan hazırda 2021-ci il LİM proqramında 20 nəfərin iştirakını maliyyələşdirir. Hər qurumdan 10 nəfər olmaqla, bu iştirakçılar Ekologiya və Təbii Sərvətlər Nazirliyinin və İcbari Tibbi Sığorta üzrə Dövlət Agentliyinin nümayəndələridir.
BP-nin bu dəstəyinin ümumi məbləği 170 min AZN-dir.
LİM layihəsi yerli menecerlərin müfəssəl beynəlxalq layihə idarəetmə proqramından istifadəsini təmin etmək məqsədilə xüsusi olaraq tərtib edilib. Ümumilikdə 7 moduldan ibarət olan LİM proqramını tam bitirənlər ABŞ-ın Dyuk Universitetinin qlobal miqyasda tanınan “Layihə İdarəetmə üzrə Peşəkar Sertifikat”ını (" Professional Certificate in Project Management") əldə edir və DCPM (“Duke Certified Project Managers”) dərəcəsini qazanırlar.
Bölmənin digər xəbərləri
