Braziliyanın Pernambuko ştatı Azərbaycan ilə əməkdaşlıq qurmaqda maraqlıdır
Bakı, 13 mart, AZƏRTAC
Azərbaycanın Braziliyadakı səfiri Elnur Sultanov bu ölkənin Pernambuko ştatına işgüzar səfər edib.
Xarici İşlər Nazirliyinin mətbuat xidmətindən AZƏRTAC-a bildiriblər ki, səfər çərçivəsində E.Sultanov Pernambuko ştatının qubernatoru Paulo Kamara ilə görüşüb.
Görüşdə səfir Azərbaycan-Braziliya əlaqələrinin uğurla inkişaf etdiyini bildirərək, Azərbaycan ilə Pernambuko ştatı arasında əməkdaşlıq imkanlarının öyrənilməsinin, qarşılıqlı səfərlərin təşkilinin vacibliyini vurğulayıb. O, Azərbaycanın müasir inkişafı, mədəniyyətlər və dinlərarası dialoqa verdiyi töhfə, həmçinin ölkəmizin ev sahibliyi edəcəyi beynəlxalq əhəmiyyətli tədbirlər, xüsusilə birinci Avropa Oyunları barədə söhbət açıb.
P.Kamara Pernambuko ştatının Azərbaycan ilə əlaqələrin qurulmasında maraqlı olduğunu söyləyərək, ştatın inkişafı və həyata keçirilən müxtəlif layihələr haqqında danışıb.
Səfər çərçivəsində E.Sultanov Pernambuko ştatının digər rəsmi şəxsləri ilə də görüşüb və müxtəlif sahələrdə əməkdaşlıq imkanları müzakirə edilib.
Bölmənin digər xəbərləri
