BRİTANİYA ALİMİ “TELEFON TELEPATİYASI”NIN MÖVCUDLUĞUNU SÜBUTA YETİRDİ
AZƏRTAC ABŞ-ın Si-En-En telekanalının yaydığı məlumata istinadla xəbər verir ki, Şeldreyk telefon zəngləri və hətta elektron poçtla göndərilən məktublar barəsində bu fenomenin həqiqiliyini sübut etmək üçün eksperimentlər aparmışdır.
O, tədqiqat zamanı hər bir iştirakçıdan dörd nəfər tanışı və ya qohumunun adlarını və telefon nömrələrini bildirməyi xahiş etmişdir. Bundan sonra tədqiqatçılar həmin adamlardan biri ilə əlaqə saxlayaraq, ondan xahiş etmişlər ki, eksperiment iştirakçısına zəng vursun. O isə, öz növbəsində, telefona yaxınlaşmazdan əvvəl zəng vuranı identifikasiya etməli idi.
Şeldreyk Britaniya Elmin İnkişafı Assosiasiyasının illik iclasında məruzəsində demişdir: “Düzgün cavablar 45 faiz təşkil etmişdir ki, bu da gözləniləndən, 25 faizdən xeyli çoxdur”.
Onun sözlərinə görə, telefon əvəzinə elektron poçtdan istifadə edildikdə də eyni nəticə əldə olunmuşdur. Alim vurğulamışdır ki, “təsadüfilik ehtimalı milyardda birə bərabərdir”.
Lakin tədqiqat çox kiçik tərkibli qrupda aparılmışdır – telefon eksperimentində 63, elektron poçt eksperimentində isə 50 nəfər iştirak etmişdir. Üstəlik, onlara cəmi dörd telefon və beş e-mail nömrəsini bildirmək təklif olunmuşdu. Bu isə alimin həmkarlarına onun tədqiqatına bir qədər şübhə ilə yanaşmağa əsas vermişdir.
Buna baxmayaraq, Şeldreyk ruhdan düşmür və deyir ki, yeni eksperiment aparacaq və bu effektin SMS-məlumat barəsində də olub-olmadığını öyrənəcəkdir.
Bölmənin digər xəbərləri
