Bakı, 1 iyun, AZƏRTAC

28 May – Müstəqillik Gününün 105-ci ildönümü ilə əlaqədar olaraq Azərbaycanın Böyük Britaniyadakı səfiri Elin Süleymanovun “Diplomat” jurnalında məqaləsi dərc edilib.

Səfirlikdən AZƏRTAC-a verilən məlumata görə, məqalədə qeyd olunur ki, qısa müddət mövcud olmasına baxmayaraq Azərbaycan Xalq Cümhuriyyətinin qoyduğu irs 1991-ci ildə Azərbaycan Respublikası öz müstəqilliyini bərpa etdikdən sonra milli kimliyin və dövlətçiliyin mühüm tərkib hissəsini təşkil edib.

Bildirilir ki, müstəqilliyini bərpa etdikdən sonra Azərbaycan Respublikası ilə Böyük Britaniya arasında beynəlxalq hüquqa əsaslanan və regionunun gələcəyinə ümumi baxış əsasında formalaşmış güclü tərəfdaşlıq qurulub. Azərbaycanın təşəbbüsü ilə həyata keçirilən və Britaniyanın strateji tərəfdaş kimi cəlb olunduğu Bakı-Tbilisi-Ceyhan neft kəmərinin və Cənub Qaz Dəhlizi layihələrinin Avropanın enerji xəritəsini dəyişdiyi vurğulanır. Regional əməkdaşlığın əsas sütunlarından birini təşkil edən Avropa, Qafqaz və Mərkəzi Asiyanı birləşdirən Orta Dəhlizin son zamanlar baş verən geosiyasi təlatümlərin fonunda böyük strateji dəyər qazandığı qeyd olunur.

Azərbaycan və Britaniya arasında humanitar sahədə əməkdaşlıqdan bəhs edərkən, Britaniyanın aparıcı universitetlərində minlərlə azərbaycanlının təhsil alması, hər il Vindzor Kral Atçılıq Şousunda Azərbaycanın mədəniyyətinin nümayiş olunması, Kral III Çarlzın himayədarlıq etdiyi ənənəvi incəsənət üzrə şahzadə məktəbinin İçərişəhərdə fəaliyyəti misal olaraq göstərilir.

Azərbaycan və Britaniya arasında mövcud olan uğurlu əməkdaşlığın əsasının Azərbaycan xalqının Ümummilli Lideri Heydər Əliyev tərəfindən qoyulduğu, müasir Azərbaycanın uğurlarının məhz onun uzaqgörən rəhbərliyi sayəsində mümkün olduğu bildirilir. Qeyd olunur ki, Britaniya vətəndaşları mərhum Kraliça Ülyahəzrət II Elizabetin xatirəsinə necə ehtiram bəsləyirlərsə, cari ildə Heydər Əliyevin yüzilliyini qeyd edən xalqımız onun irsini minnətdarlıqla xatırlayır.

Məqalədə Azərbaycan Prezidenti İlham Əliyevin regional inteqrasiya və əməkdaşlıq təşəbbüslərinin beynəlxalq ictimaiyyət tərəfindən dəstəkləndiyi qeyd olunur. Bu xüsusda qonşu Ermənistanla otuzillik münaqişədən sonra öz ərazi bütövlüyünü bərpa edən Azərbaycanın Cənubi Qafqazda davamlı sülhün təmin edilməsi üçün sülh sazişi imzalamaqda israrlı olduğu vurğulanır. Zorakı münaqişələr və qeyri-sabitliklə dolu dünyada Prezident İlham Əliyevin sülhlə bağlı gündəliyinin regionunun firavan və təhlükəsiz gələcəyi üçün əsas olduğu diqqətə çatdırılır.

Həmçinin məqalədə işğaldan azad edilmiş Azərbaycan ərazilərinin dirçəldilməsində Britaniya şirkətlərinin əsas tərəfdaşlar sırasında olduğu bildirilir, ərazilərin minalardan təmizləməsi səylərini dəstəkləməklə bir vaxtlar işğal olunmuş torpaqların mülki əhalisinin qayıtmasına və iqtisadi fəaliyyət üçün təhlükəsiz olmasına Britaniyanın öz töhfəsini verdiyi qeyd edilir.