Britaniyada mobil telefon oğurluqları iki dəfə artıb
London, 7 fevral, AZƏRTAC
Son beş ildə Britaniyada mobil telefon oğurluqlarının sayı iki dəfə artaraq 83 min 900-ə çatıb.
AZƏRTAC “The Independent”ə istinadla xəbər verir ki, maskalı dəstələrin elektrik velosipedlərindən istifadə edərək telefonları oğurlaması bu artımın əsas səbəblərindən biridir. Hazırda ölkə üzrə hər gün orta hesabla 225 mobil telefon oğurlanır. Əldə edilən məlumatlara görə, ötən ilin iyul ayına qədər olan 12 aylıq dövrdə 83 min 900 telefon oğurluğu qeydə alınıb. Bu, beş il əvvəlki 45 min 800 hadisə ilə müqayisədə iki dəfəyə yaxın artım deməkdir.
Mobil telefon oğurluqlarının ən çox qeydə alındığı şəhər London olub. Paytaxtda son beş il ərzində bu cinayətlərin sayı iki dəfədən çox artaraq 65 min 600-ə çatıb. Polisin verdiyi məlumata görə, güclü cinayətkar qruplaşmalar elektrik velosipedlərindən istifadə edərək izdihamlı ərazilərdə 1500 funt sterlinq dəyərində mobil telefonları qurbanlarının əlindən oğurlayaraq qaçır.
Böyük Britaniyanın daxili işlər naziri İvet Kuper bildirib ki, insanların küçədə mobil telefon istifadə edərkən özlərini güvəndə hiss etməməsi tamamilə qəbuledilməzdir. O, çərşənbə günü mobil telefon oğurluqlarına qarşı mübarizə üçün yeni polis səlahiyyətlərinin veriləcəyini elan edib. Həmçinin smartfon oğurluqlarına dair xüsusi toplantıya rəhbərlik etdiyini bildirən nazir polis qüvvələrinin bu cinayətlərə qarşı mübarizəni gücləndirəcəyini və həbs qərarlarının sürətləndiriləcəyini vurğulayıb.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
