Britaniyalı diplomat Rusiyadan çıxarılır
London, 15 yanvar, AZƏRTAC
Rusiyanın Xarici İşlər Nazirliyi Böyük Britaniya diplomatının ölkəni tərk etməsi barədə qərar verildiyini açıqlayıb.
AZƏRTAC BBC-yə istinadla xəbər verir ki, rəsmi Moskva diplomatı səfirlikdə gizli kəşfiyyat fəaliyyəti aparmaqda ittiham edir.
Nazirliyin yaydığı məlumata görə, adı açıqlanmayan şəxsin akkreditasiyası ləğv olunub və ona iki həftə ərzində Rusiyanı tərk etmək tapşırılıb. Bildirilib ki, məsələ ilə bağlı Böyük Britaniyanın Moskvadakı işlər üzrə müvəqqəti vəkili Deyni Dolakiya Rusiya Xarici İşlər Nazirliyinə çağırılıb.
Rusiya tərəfi ölkə ərazisində bəyan edilməmiş Britaniya kəşfiyyat əməkdaşlarının fəaliyyətinə dözməyəcəyini vurğulayıb və rəsmi Londonun vəziyyəti gərginləşdirməsi halında əlavə addımların atılacağı barədə xəbərdarlıq edib. Britaniya hökuməti ittihamlara hələlik münasibət bildirməyib.
Qeyd edək ki, son illər Rusiya və Böyük Britaniya arasında diplomatik münasibətlər xeyli pisləşib. Ötən ilin martında Rusiya iki britaniyalı diplomatı casusluq ittihamı ilə ölkədən qovub, Britaniya Xarici İşlər Nazirliyi isə bu iddiaları əsassız adlandırıb.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
