Brüsseldə Birinci Misir-Avropa İttifaqı Sammiti keçiriləcək
Qahirə, 21 oktyabr, AZƏRTAC
Sabah Brüsseldə Birinci Misir-Avropa İttifaqı Sammiti işinə başlayacaq. Misir Prezidenti Əbdülfəttah əs-Sisi tədbirdə iştirak etmək üçün Brüsseldə səfərdədir.
AZƏRTAC xəbər verir ki, bunu Misir Prezidentinin sözçüsü Məhəmməd əş-Şinavi deyib. “Misirlə Avropa İttifaqı arasında ilk dəfə keçiriləcək bu tarixi sammit 2024-cü ilin mart ayında Qahirədə rəsmi şəkildə başlanmış hərtərəfli strateji tərəfdaşlıq prosesinin nəticəsidir”, - deyə sözçü əlavə edib.
Sammit çərçivəsində Misir Prezidenti Avropa İttifaqının yüksəksəviyyəli rəsmiləri, eləcə də bir sıra Avropa liderləri və Belçika Kralı ilə mühüm görüşlər keçirəcək. Məqsəd ortaq maraq doğuran regional və beynəlxalq məsələlər üzrə əməkdaşlığı dərinləşdirməkdir.
Eyni zamanda, səfər çərçivəsində Misirdə investisiya imkanlarına dair geniş iqtisadi forum keçiriləcək. Forumda Avropanın aparıcı şirkətləri və iş dünyasının rəhbərləri geniş şəkildə təmsil olunacaqlar.
Misir Statistika İdarəsinin bu ilin mart ayında yaydığı məlumata əsasən, 2023-cü ildə Misir ilə Avropa İttifaqı ölkələri arasındakı ticarət dövriyyəsi təxminən 31,2 milyard ABŞ dolları təşkil edib.
Avropa İttifaqı Misirdə aparıcı investor sayılır. Belə ki, Avropa İttifaqının Misirdə ümumi investisiyalarının həcmi 38,8 milyard avroya yaxındır. Bu da Misirdə ümumi birbaşa xarici investisiyaların 39 faizini təşkil edir. Avropa İttifaqının Misirdəki nümayəndəliyinin saytında yerləşdirilən məlumata görə, Misir Yaxın Şərq və Şimali Afrika regionunda Aİ-dən ən çox birbaşa investisiya alan ikinci ölkədir.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
