Bak, 7 mart, AZƏRTAC

Bakı Slavyan Universiteti (BSU) və Naxçıvan Muxtar Respublikasının Təhsil Nazirliyinin birgə təşkilatçılığı ilə BSU-nun “Konstitusiya və Suverenlik İli” tədbirlər planı çərçivəsində “Yeni dövrün Azərbaycanı” mövzusunda Naxçıvan şəhəri, Heydər Əliyev Uşaq-Gənclər Yaradıcılıq Mərkəzində şagirdlərlə görüş keçirilib.

BSU-dan AZƏRTAC-a bildirilib ki, tədbirin məqsədi “Konstitusiya və Suverenlik İli”nin əhəmiyyətini məktəblilərə çatdırmaq, onları vətəndaş hüquq və vəzifələri barədə məlumatlandırmaq, eyni zamanda universitet həyatı və tələbəlik dövrü haqqında geniş təsəvvür formalaşdırmaqdan ibarət olub.

Tədbirin açılışında Naxçıvan Muxtar Respublikasının təhsil naziri Elxan Nəcəfov çıxış edərək, BSU ilə birgə təşkil olunan bu görüşün əhəmiyyətindən bəhs edib. O vurğulayıb ki, Naxçıvan Təhsil Nazirliyinin illik tədbirlər planında şagirdlərlə interaktiv görüşlərin keçirilməsi mühüm yer tutur və bu görüşlər “Konstitusiya və Suverenlik İli” çərçivəsində daha da aktuallaşıb.

BSU-nu rektoru Anar Nağıyev çıxışında Azərbaycanda 2025-ci ilin “Konstitusiya və Suverenlik ili” elan olunmasının əhəmiyyətindən və dövlətçiliyimizin hüquqi əsaslarının formalaşmasında Konstitusiyanın rolundan bəhs edib. Rektor Azərbaycan Respublikasının 1995-ci ildə qəbul edilmiş Konstitusiyasının ölkənin hüquqi-siyasi sisteminin əsasını təşkil etdiyini deyərək, 2002, 2009 və 2016-cı illərdə həyata keçirilmiş konstitusiya islahatlarının mahiyyətini və zəruriliyini təhlil edib. Qeyd edib ki, islahatlar nəticəsində siyasi, sosial, iqtisadi və hüquqi sahələrdə mühüm yeniliklər baş verib, dövlət idarəçiliyinin təkmilləşməsi, insan hüquq və azadlıqlarının müdafiəsi üçün daha geniş baza formalaşdırılıb.

Anar Nağıyev, həmçinin müasir dövrün beynəlxalq və regional geosiyasi reallıqlarına toxunaraq, dünyanın siyasi xəritəsində baş verən dəyişikliklər fonunda Azərbaycanın mövqeyini təhlil edib. O, Ümummilli Lider Heydər Əliyevin siyasi kursunun Prezident İlham Əliyev tərəfindən uğurla davam etdirildiyini vurğulayıb.

Rektor 2003-cü ildən etibarən Prezident İlham Əliyevin həyata keçirdiyi daxili və xarici siyasətin Azərbaycan dövlətçiliyinin möhkəmlənməsində, sosial rifahın yüksəlməsində, təhsil və səhiyyə sisteminin inkişafında mühüm rol oynadığı vurğulayıb. Azərbaycan Ordusunun gücləndirilməsi, 2020-ci ildə Vətən müharibəsi nəticəsində ərazi bütövlüyünün bərpa edilməsi və 2023-cü ildə keçirilən antiterror tədbirlərinin əhəmiyyətini qeyd edib.

A. Nağıyev çıxışında dövlətimizin başçısı İlham Əliyevin 2024-cü il fevralın 14-də yenidən prezident seçilməsindən sonra söylədiyi çıxışa diqqət çəkərək, bu çıxışın gənc nəslin üzərinə qoyduğu böyük məsuliyyəti, gəncləşmə siyasətini, eləcə də yeni dövrün çağırışlarını əks etdirdiyini deyib. O, bu tarixi hadisənin ölkənin siyasi-iqtisadi inkişafı baxımından mühüm mərhələ olduğunu vurğulayaraq, yeni dövrün geosiyasi reallıqları kontekstində Qərb-Rusiya münasibətləri, Cənubi Qafqazda sülhün təmin olunması üçün yaradılan maneələr, Türk Dövlətləri Təşkilatının artan rolu və Azərbaycanın regional təhlükəsizlik kompleksinə çevrildiyini bildirib. Rektor vurğulayıb ki, Azərbaycan xalqı qüdrətlidir və biz öz taleyimizi özümüz həll etdiyimizi sübut etdik.

BSU-nun rəhbəri çıxışında Ulu Öndər Heydər Əliyevin bizə qoyduğu dəyərli miraslardan biri olan azərbaycançılıq ideologiyasının uğurla davam etdirildiyini bildirib. Bununla yanaşı, rektor işğaldan azad edilmiş ərazilərdə mina təmizlənməsi, keçmiş məcburi köçkünlərin doğma torpaqlarına qayıdışı, Zəngəzur dəhlizinin regional və beynəlxalq əhəmiyyəti, eləcə də “yaşıl enerji” zonalarının yaradılması məsələlərinə toxunub. O, həmçinin Azərbaycanın qlobal iqlim liderinə çevrildiyini və COP29-a ev sahibliyi etdiyi dönəmdə bir sıra mühüm qərarlar qəbul edildiyini vurğulayıb.

Görüşdə çıxış edən Milli Məclisin deputatı, BSU-nun Jurnalistika kafedrasının müdiri Vüqar Rəhimzadə “Konstitusiya və Suverenlik İli”nin elan edilməsinin mahiyyətini izah edərək, onun ölkəmiz üçün tarixi əhəmiyyətindən danışıb.

Tədbirdə şagirdlər konstitusiya və suverenlik mövzularında, eləcə də universitet həyatı, təhsil imkanları və ölkənin inkişaf perspektivləri ilə bağlı onları maraqlandıran sualları ünvanlayaraq geniş fikir mübadiləsi aparıblar.