Bu gün regionda bütün proseslərin açarı Azərbaycanın yaratdığı reallıqlardan keçir - ŞƏRH
Bakı, 14 sentyabr, AZƏRTAC
Uşaq yaşlarında biz bu atalar sözünü tez-tez eşidirdik: “Qozbeli qəbir düzəldər”. Əvvəllər bunun mahiyyətini tam başa düşməsək də, sonradan bəlli oldu ki, ulu babalarımız bu ifadəni daha çox pis əməllərlə məşğul olan, iyrənc xüsusiyyətlərə sahib şəxslər barədə işlədiblər. Yəni onların bu xasiyyətinin heç vaxt dəyişməyəcəyinə, ölümlə bu xüsusiyyətlərini özləri ilə o dünyaya aparacaqlarına işarə ediblər. İndi biz bu atalar sözünü revanşist ermənilərə və onların xaricdəki havadarlarına da şamil edə bilərik. Çünki onlar dağıdıcı niyyətlərindən, faşist əməllərindən və bu əməlləri davam etdirmək arzusundan əl çəkmirlər. Ən nəhayət, Azərbaycan düşmənçiliyindən əl çəkmirlər və görünən odur ki, ölənə kimi bu xüsusiyyətlərində və niyyətlərində qalacaqlar.
Bu fikirləri AZƏRTAC-a açıqlamasında “Orta Asiya və Güney Qafqaz Söz Azadlığı Şəbəkəsi” İctimai Birliyinin sədri, siyasi şərhçi Nadir Azəri bildirib.
Siyasi şərhçi deyib ki, erməni revanşist qüvvələrin və onların xaricdəki havadarlarının növbəti sarsaq və əsassız iddialarının büruzə verilməsinin isə bir neçə gün öncə Azərbaycanda fəaliyyət göstərən diplomatik korpus nümayəndələrinin işğaldan azad olunmuş ərazilərə səfərindən dərhal sonra şahid olduq: “Bu səfər zamanı diplomatların işğaldan azad olunmuş ərazilərdə aparılan quruculuq-abadlıq işlərini necə sevinclə izləməsi hər bir diplomatın gözündən hiss olunurdu. Onların öz evlərinə, baba yurdlarına qayıtmış azərbaycanlılarla, hətta uşaqlarla mehribanlıqla görüşməsi bütün dünyanın diqqətində oldu. Təbii ki, bunu revanşistlər və onların xaricdəki havadarları da gördü və bundan sonra yenidən sarsaq, əsassız iddialar səsləndirməyə başladılar”.
N.Azəri qeyd edib ki, revanşistlərin və onların havadarlarının iddiaları da uydurduqları erməni tarixi kimi əsassız və boşdur. Elə səfər zamanı diplomatlara nümayiş olunan, cəmi bir neçə səhifəsi yazılmış, qalan hissəsi boş olan “qədim” erməni kitabı kimi. Bu gün revanşistlərin hansısa kilsələr barədə irəli sürdükləri iddialar da həmin kitabdakı kimi boşdur. Sadəcə bunlar uydurulub. Zaman-zaman özləri üçün mifik tarix yaradıblar. Xalqlara düşmən kəsilsələr, qan töksələr, Azərbaycan torpaqlarını işğal etsələr də, beynəlxalq arenada özlərini məzlum, guya hücuma və assimilyasiyaya məruz qalan xalq kimi qələmə veriblər. Torpaqlarımızın işğaldan azad olunmasından sonra bütün dünya onların təkcə insanlara deyil, daşa, divara, təbiətə, hətta heyvanlara qarşı belə necə vəhşi və qəddar, faşist xüsusiyyəti ilə hərəkət etdiyinin şahidi oldu. Bu dəfə ərazilərə səfər edən diplomatlar da həmin torpaqların işğaldan dərhal sonrakı vəziyyəti ilə bugünkü mənzərəsini müqayisə edərək Azərbaycan dövləti və xalqının böyük əzmkarlıqla gördüyü işlərin nəticəsini müşahidə ediblər. Diplomatlar erməni işğalçılarının 30 il ərzində cəhənnəmə döndərdiyi yurdların yenidən cənnətə çevrildiyini görür və bunu təqdir edirlər. Bu da revanşistləri və onların havadarlarını dəliyə döndərir. Ona görə də Azərbaycanın ünvanına hədyanlar, yalanlar və iftiralar səsləndirməklə məşğuldurlar: “Ermənistandakı revanşistlər və onların xaricdəki havadarları bir şeyi aydın bilsinlər: Azərbaycan dövləti qüvvətli dövlətdir, qalib dövlətdir. Bu gün regionda bütün proseslərin açarı Azərbaycanın yaratdığı reallıqlardan keçir. Bu reallığı qəbul edənlər iqtisadi inkişafa doğru addımlayacaq, qəbul etməyənlərin isə gələcəyi sual altındadır”.
Nadir Azəri bildirib ki, onlar Azərbaycan xalqına və dövlətinə qarşı törətdikləri cinayətləri unutmamalıdırlar: “Azərbaycan dövlətinə qarşı hədyanlar və yalanlar dövrü artıq bitib. Dünya reallığı görüb və qəbul edib. Dünya onu da bilib ki, işğal dövründə bu qəddar qüvvələr Azərbaycan torpaqlarında daşı daş üstünə qoymayıblar. Bilsinlər ki, törədilən cinayətlər heç vaxt cəzasız qalmır və onlar da gec-tez cəzalarını alacaqlar”.
Bölmənin digər xəbərləri
