Buzovna çimərliyi ərazisi məişət tullantılarından təmizlənmişdir
Bakı, 1 oktyabr (AZƏRTAC). Heydər Əliyev Fondunun təşəbbüsü ilə “Təmiz Şəhər” ASC tərəfindən Buzovna çimərliyində təmizlik aksiyası keçirilmişdir.
“Təmiz Şəhər” ASC-dən AZƏRTAC-a bildirmişlər ki, çimərlik mövsümündən əvvəl və sonra iməciliklərin keçirilməsi artıq ənənə halını almışdır. Budəfəki aksiyanın məqsədi şəhərimizin qonaqları üçün təmiz və gözəl istirahət şəraiti yaratmaq, paytaxt sakinlərini ətraf mühiti çirkləndirməkdən çəkindirməkdir.
“Təmizlik naminə” devizi ilə keçirilən aksiyada bir daha “Xəzərin sahillərinin ekoloji sağlamlığı hər birimizdən asılıdır” mesajı ictimaiyyətin diqqətinə çatdırılmışdır.
Aksiyaya qəsəbə sakinləri, xüsusilə gənclər qoşulmuşlar. Nəqliyyat, köynək, papaq və əlcəklərlə təmin edilmiş aksiya iştirakçıları tərəfindən çimərlik ərazisi müxtəlif məişət tullantılarından təmizlənmişdir.
Toplanmış bütün tullantılar hazırda sınaq rejimində fəaliyyət göstərən tullantıların çeşidlənməsi zavoduna daşınmışdır.
Bölmənin digər xəbərləri
