CAMAL RƏHİMOV: PEKİN OLİMPİADASINDA AZƏRBAYCANI ƏN YÜKSƏK SƏVİYYƏDƏ TƏMSİL EDƏCƏYƏM
AZƏRTAC xəbər verir ki, Pekin Yay Olimpiya Oyunlarına atçılıq idmanında yeganə lisenziyanın sahibi azərbaycanlı jokey Camal Rəhimov iyulun 16-da Gənclər və İdman Nazirliyində mətbuat konfransı keçirmişdir.
Dördilliyin ən böyük idman oyunlarına braziliyalı əfsanəvi Nelson Pesoanın rəhbərlyi ilə hazırlaşdığını deyən C.Rəhimov ilk dəfə olaraq Azərbaycan çaparının idmanın bu növü üzrə Olimpiya Oyunlarında iştirakını böyük uğur kimi dəyərləndirmişdir.
Olimpiya Oyunlarına lisenziyanı 18 ay ərzində gərgin hazırlıqlar nəticəsində qazandığını deyən C.Rəhimov Pekin Olimpiadasında Azərbaycanı ən yüksək səviyyədə təmsil edəcəyini vurğulamışdır. O, göstərilən dəstəyə görə Azərbaycanın birinci xanımı, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevaya, gənclər və idman naziri Azad Rəhimova minnətdarlığını bildirmişdir.
C.Rəhimov uzun müddət Belçikada yaşamasının səbəbini də açıqlamışdır. Belçika Avropada atçılıq idmanının mərkəzidir. Bu üzdən mən orada yaşamağa üstünlük verirəm.
Azərbaycanda idmanın bu növünün inkişafı üçün hər cür şəraitin olduğunu deyən C.Rəhimov bunun üçün təcrübəli mütəxəssislərin tələb olunduğunu söyləmişdir.
Qeyd edək ki, Pekin Olimpiadasında atçılıq idmanı üzrə fərdi birincilikdə 79 jokey iştirak edəcəkdir. Onlardan yalnız ən yüksək reytinq xallarına malik 25 nəfər finala adlayacaqdır.
Bölmənin digər xəbərləri
