Cari il Bakıda beşulduzlu üç yeni mehmanxana açılacaqdır
Bakı, 17 yanvar (AZƏRTAC). Ötən il Azərbaycanda “Turizm ili” elan edilmişdir. “Turizm ili” ərzində bu sahəyə daha da böyük diqqət göstərilmişdir. Biz Azərbaycanı müasir, yüksək səviyyəli və elitar turizm mərkəzinə çevirməliyik. Mən dünya turizm xəritəsində Azərbaycanın yerini belə görürəm.
AZƏRTAC xəbər verir ki, bu sözləri Prezident İlham Əliyev yanvarın 16-da Nazirlər Kabinetinin 2011-ci ilin sosial-iqtisadi inkişafının yekunlarına və 2012-ci ildə qarşıda duran vəzifələrə həsr olunmuş iclasında demişdir.
Dövlətimizin başçısı vurğulamışdır ki, ötən il təkcə Bakıda beşulduzlu üç mehmanxana açılmışdır. Bu il ən azı yenə də Bakıda beşulduzlu üç yeni mehmanxana açılacaqdır. Bölgələrdə də bu proses gedir. İndi bölgələrdə beşulduzlu mehmanxanalar tikilir, ən azı dördü tikilir. Ən vacib turizm mərkəzlərinə özüm baş çəkirəm, vəziyyətlə tanış oluram.
Şahdağ Turizm Kompleksinin də bu il istifadəyə veriləcəyini qeyd edən Prezident İlham Əliyev demişdir ki, bu, dünya miqyasında nadir xizək kurortu olacaqdır. Dünyanın ən gözəl xizək mərkəzlərindən biri olacaqdır. Çünki dünyanın ən gözəl yerlərində olan müsbət təcrübəni biz ora gətiririk, tətbiq edirik.
Bölmənin digər xəbərləri
