Bakı, 18 oktyabr, AZƏRTAC

Oktyabrın 18-də Bakıda “Caspian European Club” və “Caspian American Club” tərəfindən turizm sektoruna həsr olunmuş “Caspian Energy Tourism Forum”unun xüsusi sessiyası təşkil olunub.

AZƏRTAC xəbər verir ki, mədəniyyət və turizm nazirinin müavini Nazim Səmədovun iştirakı ilə keçirilən xüsusi sessiyada turizm sektoru ilə bağlı əsas məsələlər və problemlər müzakirə edilib.

Nazir müavini iştirakçılara ölkənin turizm sektorunun gələcək inkişafı istiqamətində görülən tədbirlər, planlar və perspektivlər barədə məlumat verib.

Dövlətlə sahibkarlar arasında səmərəli dialoq üçün yaradılmış şəraitə görə klub rəhbərliyinə minnətdarlığını bildirən Nazim Səmədov nazirliyin sahibkarlar və onları təmsil edən ictimai təşkilatlarla diskussiya üçün hər zaman açıq olduğunu vurğulayıb.

Qeyd edib ki, son illər ölkəmizdə qeyri-neft sektorunun bir çox sahələri, o cümlədən turizm öz inkişaf dövrünü yaşayır. “Əlbəttə bu, ölkə rəhbərliyinin qeyri-neft sektorunun inkişafı üzrə uzun illər ərzində həyata keçirdiyi məqsədyönlü fəaliyyətin nəticəsidir. Məhz bu tədbirlərin nəticəsində turizm sektorunda mühüm nailiyyətlər əldə etmişik”, - deyə nazir müavini vurğulayıb.

Statistik göstəricilər barədə söz açan nazir müavini son iki il ərzində ölkəmizə xarici turist axınının artdığını vurğulayıb: “2015-ci illə müqayisədə ölkəmizə gələn xarici turistlərin sayı 2016-cı ildə 11,7 faiz artaraq 2 milyon 248 800 nəfər olub. Bu ilin ilk 9 ayı ərzində Azərbaycana səfər etmiş əcnəbi vətəndaşların sayı ötən ilin analoji dövrü ilə müqayisədə 20,9 faiz, yəni 2 milyon 71918 nəfər artıb. Əsas artım Rusiya, İran, BƏƏ və İraqdan gələn turistlərin sayında müşahidə olunur”.

Bakı Şopinq Festivalının əhəmiyyətini qeyd edən N.Səmədov festivalın təşkilinə dövlət büdcəsindən 5,6 milyon manat ayrılmasına baxmayaraq, xərclənən vəsaitin 1 milyon manatı keçmədiyini bildirib.

Nazir müavini vurğulayıb ki, turistlərin məmnunluğunu yüksəltmək üçün “Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi” əsasında milli turizm keyfiyyət sisteminin yaradılması planlaşdırılır.

Görüşdə, həmçinin özəl sektorla əməkdaşlığın genişləndirilməsi istiqamətləri qeyd olunub, eyni zamanda “Caspian European Club” və “Caspian American Club”un üzv şirkətlərini maraqlandıran suallar müzakirə edilib.

“Caspian European Club” və “Caspian American Club”un sədrinin birinci müavini və baş icraçı direktoru Telman Əliyev konstruktiv dialoqa, həmçinin iş adamlarının, eləcə də kluba üzv şirkətlərinin problemlərinin həllindəki fəal iştiraka görə Mədəniyyət və Turizm Nazirliyinə təşəkkürünü bildirib.

Telman Əliyev xatırladıb ki, dünyanın 50 ölkəsindən olan 5 mindən artıq şirkət və təşkilatı birləşdirən “Caspian European Club” 2002-ci ildə Xəzər-Qara dəniz regionunda fəaliyyət göstərən nəhəng neft-qaz şirkətlərinin dəstəyi ilə yaradılıb və onun sədri Prezident İlham Əliyevdir.

“Caspian European Club” Azərbaycanda həyata keçirilən iqtisadi islahatlarda, xarici investisiyanın cəlb olunmasında, orta və kiçik biznesin inkişafında fəal iştirak edir. Bundan əlavə, klub Xəzər-Qara dəniz və Baltik regionu dövlətləri arasında beynəlxalq iqtisadi əlaqələrin qurulmasında mühüm rol oynayır”, - deyə Telman Əliyev söyləyib.

O, həmçinin ilin sonunadək “Caspian European Club” tərəfindən iqtisadiyyatın başqa sahələri üzrə də bir sıra tədbirlərin keçiriləcəyini əlavə edib. Qeyd edib ki, “Caspian Energy Georgia”nın sentyabr ayından Gürcüstan ərazisində “Caspian European Club”, “Caspian American Club” və “Caspian Energy İnternational Media Group”un maraqlarını təmsil edir. “Caspian Energy Georgia”nın fəaliyyətinin yenilənməsi çərçivəsində Gürcüstan və Azərbaycan hökumətlərinin, həmçinin “Caspian European Club”un dəstəyi ilə gələn ilin martında 5-ci Beynəlxalq “Caspian Energy Forum”u təşkil olunacaq.

Biznes-forumda Nazim Səmədova “Caspian European Club” və “Caspian American Club”un fəxri üzvlük sertifikatı təqdim olunub.

Tədbirdə Azərbaycan, Qazaxıstan, Rusiya, Türkiyə, İran, Avropa İttifaqından olan 200-ə yaxın biznesmen, həmçinin ölkəmizdə akkreditə olunmuş diplomatik nümayəndəliklərin və beynəlxalq təşkilatların təmsilçiləri iştirak ediblər.

Günün ikinci yarısında 7-ci “CEO Lunch Baku” təşkil olunub. Telman Əliyev “Caspian European Club” və “Caspian American Club”un hər ayın üçüncü çərşənbə günü CEİBC şirkətlərinin top-menecerlərinin iştirakı ilə Bakıda “CEO Lunch” təşkil etdiyini vurğulayıb. O, Bakıda növbəti “CEO Lunch”ın noyabrın 15-də “Caspian Energy Finance Forum” çərçivəsində baş tutacağını bəyan edib.

Daha sonra qeyri-rəsmi şəraitdə sahibkarların üzləşdikləri problemlər müzakirə olunub, ölkənin müxtəlif regionlarında biznesin tətbiqi üzrə onları maraqlandıran məsələlərə, həmçinin iqtisadiyyatın fərqli sahələrində əməkdaşlığın genişləndirilməsi üzrə təkliflərə toxunulub.

Sonda “Caspian European Club” və “Caspian American Club”da təmsil olunan və buradakı fəaliyyətini davam etdirən şirkətlərə sertifikatlar təqdim olunub.

“Caspian Energy”, “Caspian Energy Forum”, “Caspian Energy Award”, “Caspian Energy Club”, “Caspian European Club”, “Caspian Business Club”, “Caspian American Club”, “Caspian American Forum”, CEO, “CEO Lunch”, “Brand Award” və digərləri qeydiyyatdan keçmiş ticarət markalarıdır və “Caspian Energy International Media Group”a məxsusdur.