Astara, 26 fevral, Bağır Əliyev, AZƏRTAC 

Fevralın 26-da ölkəmizin hər yerində olduğu kimi, cənub bölgəsində də Xocalı soyqırımının 26-cı ildönümünə həsr olunmuş anım tədbirlərində faciə qurbanlarının xatirəsi dərin hüznlə yad edilib.

AZƏRTAC-ın bölgə müxbiri xəbər verir ki, Astara rayonunun rəhbər işçiləri, idarə, müəssisə və təşkilatların nümayəndələri, müharibə veteranları, yaşlı nəslin, gənclərin və ictimaiyyətin təmsilçiləri Şəhidlər abidə-kompleksinin, burada uyuyan qəhrəmanların məzarları önünə gül dəstələri düzərək, Azərbaycanın suverenliyi və ərazi bütövlüyü uğrunda şəhid olanların xatirəsini dərin hüznlə anıblar.

Mərasimdə şəhidlərin ruhuna dualar oxunub.

Rayon icra hakimiyyətinin məsul işçisi, “Xocalım-ağrım mənim” kitabının müəllifi Mərasim Hacızadə bildirib ki, iyirminci əsrin ən ağır faciələrindən biri olan Xocalı faciəsi bəşər tarixində oxşarı olmayan soyqırımıdır.

Qeyd edilib ki, 1992-ci ilin fevralın 25-dən 26-na keçən gecə artilleriya zərbələrinin ardınca Ermənistan silahlı qüvvələri keçmiş sovet ordusunun 366 saylı motoatıcı alayının köməyi ilə Xocalının işğalını həyata keçirdilər. İşğalçılar Xocalını darmadağın edərək, dinc əhalini xüsusi amansızlıqla öldürdülər.

Xocalı soyqırımı nəticəsində şəhərin 5379 nəfər əhalisi deportasiyaya məruz qalıb, 613 nəfər, o cümlədən 63 uşaq, 106 qadın vəhşicəsinə qətlə yetirilib, 8 ailə tamamilə məhv edilib, 487 nəfər müxtəlif dərəcəli bədən xəsarətləri alıb, 1275 nəfər əsir və girov götürülüb. Girov götürülənlərdən 150 nəfərin, o cümlədən 68 qadın və 26 uşağın taleyi bu günədək məlum deyil. Ermənistan silahlı birləşmələri tərəfindən Xocalı şəhərinin işğal edilməsi ilə əlaqədar Azərbaycan dövlətinə və vətəndaşlarına 170 milyon ABŞ dollarından artıq ziyan vurulub.

Diqqətə çatdırılıb ki, Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq informasiya və təşviqat kompaniyasının məqsədi dünya ictimaiyyətini Xocalı faciəsi ilə bağlı məlumatlandırmaq, qətliama hüquqi-siyasi qiymət verilməsinə və bu qanlı qırğının qurbanlarının xatirəsinin anılmasına nail olmaqdır. Artıq bir neçə dövlətin parlamenti və beynəlxalq təşkilat bu qətliamı soyqırımı kimi tanıyıb.

Mərasim iştirakçıları abidə-kompleksinin önündə təşkil edilmiş Xocalı soyqırımından bəhs edən rəsm, foto və kitab sərgisi ilə tanış olublar.

Sonda rayonun bədii özfəaliyyət kollektivlərinin ifasında Xocalı soyqırımı ilə bağlı ədəbi-bədii kompozisiya nümayiş etdirilib.

X X X

Lənkəran şəhərindəki Azərbaycanlıların soyqırımı qurbanlarının xatirəsinə ucaldılmış abidə-kompleksi önündə anım mərasimi keçirilib.

AZƏRTAC-ın bölgə müxbiri xəbər verir ki, rayon rəhbərliyi, hüquq-mühafizə orqanlarının, idarə, müəssisə və təşkilatların, ictimaiyyətin nümayəndələri, tələbələr, məktəblilər abidə-kompleksi önünə tər qərənfillər düzərək, faciə qurbanlarının xatirəsini dərin hüznlə yad ediblər.

Mərasimdə gənclərin ifasında Xocalı faciəsi ilə bağlı ədəbi-bədii kompozisiya nümayiş olunub.

Anım tədbiri Lənkəran Dövlət Dram Teatrında yazıçı-publisist Ağaddin Babayevin Xocalı faciəsinə həsr edilmiş “Şəhid şəhər” tamaşası ilə davam etdirilib.

Tamaşada 1992-ci il fevralın 25-dən 26-na keçən gecə erməni silahlı dəstələrinin və rus hərbi birləşmələrinin Xocalı şəhərinə qəfil hücumu zamanı amansızlıqla öldürülən, doğma yurd-yuvalarından didərgin düşən günahsız insanların faciəli taleyi, onların vətənpərvərlik hissləri, psixoloji və mənəvi durumu təsirli səhnələrlə əks olunub.

Xocalı faciəsinin 26-cı ildönümü ilə əlaqədar Lənkəran şəhərindəki Heydər Əliyev Mərkəzində, Lənkəran Dövlət Universitetində, rayonun orta-ixtisas və ümumtəhsil məktəblərində soyqırımına həsr edilmiş dərslər, rayonun idarə, müəssisə və təşkilatlarında, qəsəbə və kəndlərdə anım mərasimləri, rəsm və kitab sərgiləri təşkil edilib.

X X X

Masallı şəhərindəki “Qəhrəmanlar parkı”nda Xocalı soyqırımının 26-cı ildönümünə həsr olunmuş anım mərasimində faciə qurbanların xatirəsi ehtiramla anılıb.

AZƏRTAC-ın bölgə müxbiri xəbər verir ki, rayon rəhbərliyi, idarə, müəssisə və təşkilatların nümayəndələri, veteranlar, ağsaqqallar, ziyalılar, gənclər, məktəblilər, Xocalıdan olan məcburi köçkünlər və şəhər sakinləri abidə önünə gül dəstələri düzərək faciə qurbanlarının xatirəsini ehtiramla yad ediblər.

Mərasimdə soyqırımı qurbanlarının ruhuna dualar oxunub, Xocalı faciəsinin dəhşətlərini əks etdirən ədəbi-bədii kompozisiya nümayiş olunub.

X X X

Lerik Rayon Mədəniyyət Mərkəzində keçirilən ümumrayon anım tədbirinin iştirakçıları əvvəlcə mərkəzin foyesində məktəblilərin Xocalı faciəsinə həsr etdikləri əl işlərindən ibarət sərgiyə baxıblar.

AZƏRTAC-ın bölgə müxbiri xəbər verir ki, tədbirdə Xocalı soyqırımı qurbanlarının xatirəsi bir dəqiqəlik sükutla yad olunub, soyqırımı qurbanlarının xatirəsinə həsr edilmiş ədəbi-bədii kompozisiya nümayiş etdirilib.

Lerik Rayon İcra Hakimiyyətinin başçısı Rövşən Bağırov çıxış edərək bildirib ki, erməni-rus hərbi birləşmələri tərəfindən törədilmiş soyqırımı nəticəsində yeddi min nəfər sakini olan Xocalı şəhərinin bir gecədə yer üzündən silinməsi və əhalisinin kütləvi surətdə qətlə yetirilməsi XX əsrin ən qanlı hadisəsidir.

Xocalı faciəsinə ilk dəfə ulu öndər Heydər Əliyev tərəfindən siyasi-hüquqi qiymət verildiyini vurğulayan R.Bağırov bu qırğının dünyada soyqırımı aktı kimi tanınması, həqiqətlərin beynəlxalq ictimaiyyətə çatdırılması istiqamətində ardıcıl iş aparıldığını, dünyanın əksər dövlətlərində hər il Xocalı soyqırımı ilə bağlı müxtəlif tədbirlərin keçirildiyini bildirib.

Anım mərasimində rayon icra hakimiyyəti başçısının müavini Arzu Vəliməmmədovanın Xocalı soyqırımının 26-cı ildönümü ilə bağlı məruzəsi dinlənilib.

Sonra rayon prokuroru Bəhruz İbrahimov, təhsil şöbəsinin əməkdaşı Hüseynbala Əliyev yüz illər boyu erməni millətçilərinin öz havadarlarının dəstəyi ilə Azərbaycana qarşı ərazi iddialarından və soyqırımı siyasətindən danışıblar.

Tədbirin sonunda Xocalı soyqırımına həsr olunmuş sənədli film nümayiş etdirilib.

X X X

Yardımlıda Xocalı faciəsinin 26-cı ildönümünə həsr olunmuş anım tədbirinin iştirakçıları Şəhidlər abidə-kompleksinin önünə gül dəstələri düzərək, Azərbaycanın suverenliyi və ərazi bütövlüyü uğrunda şəhid olanların xatirəsini ehtiramla yad ediblər.

AZƏRTAC-ın bölgə müxbiri xəbər verir ki, mərasimdə çıxış edən rayon icra hakimiyyətinin başçısı Ayaz Əsgərov ermənilərin Azərbaycan xalqına qarşı törətdiyi vəhşiliklərdən, soyqırımından danışaraq, Xocalı faciəsini XX əsrin ən qanlı cinayət aktı kimi dəyərləndirib.

Diqqətə çatdırılıb ki, şəhidlərimizin qanı ilə yuyulmuş, düşmən tapdağı altında olan torpaqlarımız, o cümlədən Xocalı şəhəri həyata keçirilən düşünülmüş və məqsədyönlü siyasət nəticəsində tezliklə işğaldan azad olunacaq.