Cənubi Koreyanın sabiq Prezidenti 5 il müddətinə azadlıqdan məhrum edilib
Pekin, 16 yanvar, AZƏRTAC
Seul məhkəməsi Cənubi Koreyanın keçmiş Prezidenti Yun Sok Yola ittiham olunduğu cinayət işlərindən biri üzrə 5 il müddətinə azadlıqdan məhrumetmə cəzası verib.
AZƏRTAC Cənubi Koreya mediasına istinadla xəbər verir ki, məhkəmə sabiq Prezidenti ölkədə hərbi vəziyyətin elanı ilə əlaqədar başlanan istintaq prosesi çərçivəsində onun saxlanılması üçün verilən həbs qərarının icrasına mane olmaqda təqsirli bilib. Xüsusi istintaq qrupunun yanvarda keçmiş Prezidenti saxlamaq cəhdinin qarşısı onun təhlükəsizlik xidməti tərəfindən alınıb.
Sabiq Prezident haqqında daha 3 ittiham, o cümlədən ölkədə hərbi vəziyyətin elan edilməsi və konstitusiya quruluşuna qarşı qiyama rəhbərlik üzrə cinayət işi üzrə məhkəmə prosesi də sona çatmaq üzrədir. Yanvarın 13-də son dinləmə keçirilib və prokuror ölkədə hərbi vəziyyətin elan edilməsi və konstitusiya quruluşuna qarşı qiyama rəhbərlik üzrə cinayət işi ilə əlaqədar ona edam cəzası verilməsini istəyir. Məhkəmədə həmin proses üzrə qərar fevralda qəbul olunacaq.
Qeyd edək ki, 2024-cü il dekabrın 3-də Koreya Respublikasının sabiq Prezidenti Yun Sok Yol ölkədəki Koreya Xalq Demokratik Respublikasının tərəfdarları ilə mübarizə aparmağın zəruriliyini əsas gətirərək hərbi vəziyyət rejimi elan edib. Cənubi Koreya Prokurorluğu onu qiyamda günahlandırdıqdan sonra Konstitusiya Məhkəməsi apreldə onun impiçmentini təsdiqləyib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
