Çinin daha bir şəhərində tam qapanma elan olunub
Pekin, 8 yanvar, AZƏRTAC
Çin Hebey vilayətinin paytaxtı olan Şıciacuan şəhərindən sonra vilayətin digər iri şəhəri olan Sintayda da COVID-19 infeksiyasına yoluxma hallarının çoxalması səbəbindən tam qapanma elan edilib. Şəhərə bütün növ nəqliyyat vasitələrinin girişi tam dayandırılıb. Heç kimin şəhəri tərk etməsinə icazə verilmir. Yalnız ərzaq, gündəlik tələbat malları və tibbi ləvazimatlar daşıyan avtomobillərin xüsusi icazə əsasında şəhərə giriş-çıxışı mümkündür.
AZƏRTAC xəbər verir ki, cari ilin başlamasından vilayətdə 304 yoluxma halı aşkarlanıb. Ötən sutka ərzində isə Çində ölkədaxili 78 yoluxma qeydə alınıb ki, onun da əsas hissəsi Hebey vilayətinin payına düşür. Hebeyin səhiyyə komitəsinin məlumatına əsasən, yoluxanlardan 5 nəfərin vəziyyəti ağırdır. Hazırda hər iki şəhərdə kütləvi şəkildə koronavirus testi aparılır. Xəstəliklə mübarizəyə və kütləvi test prosesinin icrasına dəstək üçün Çinin digər şəhərlərindən Hebeyə 10 tibbi briqada cəlb olunub.
Qeyd edək ki, bəzi ekspertlər Çində son günlər yoluxma hallarının çoxalması fonunda ölkənin pandemiyanın ikinci dalğasının astanasında olması kimi dəyərləndirirlər. Hebey vilayəti ilə yanaşı, paytaxt Pekində, Liaonin və Heyloncian vilayətlərində də yoluxmalar qeydə alınıb. Söhbət xaricdən Çinə gələnlərdə aşkarlanan yoluxma halları yox, ölkə daxilində qeydə alınmış yoluxmalardan gedir. Hazırda Çin üzrə Şıcuacuan şəhərində bir yüksək riskli zona, habelə Hebey vilayəti, Pekin şəhəri, Heyloncian və Liaonin vilayətlərində, ümumilikdə, 8 orta riskli zona var.
Çinin səlahiyyətli qurumları Hebey vilayətindəki yoluxma zəncirinin Avropadan gələn virus ştammından başlandığını güman edir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
