Çoxmeyarlı qiymətləndirmə metodları araşdırılır
Bakı, 30 mart, AZƏRTAC
İnformasiya Texnologiyaları İnstitutunun növbəti onlayn elmi seminarında “Çoxmeyarlı qiymətləndirmə metodları” mövzusunda məruzə dinlənilib.
İnstitutdan AZƏRTAC-a bildirilib ki, böyük elmi işçi Nərmin Adıgözəlova təqdim edib. O, bir-biri ilə ziddiyyət təşkil edən alternativləri seçmək, qiymətləndirmək və ranqlaşdırmaq üçün bir vasitə olan çoxmeyarlı qərar qəbuletmə (Multi-Criteria Decision Making - MCDM) haqqında məlumat verib. Qeyd edilib ki, MCDM bir neçə meyardan istifadə edərək qiymətləndirilən alternativlər üçün qlobal üstünlük əlaqəsinin qurulması, hər biri çoxsaylı və tez-tez ziddiyyətli meyarlarla qiymətləndirilən bir sıra alternativlərdən ən yaxşısının seçilməsidir.
N.Adıgözəlova MCDM-in əsas komponentləri və növlərindən də söz açıb. O, sadə əlavə çəki (Simple Additive Weighting), analitik iyerarxiya prosesi (Analytic Hierarchy Process), ideal həllə yaxın ardıcıllıq metodu (TOPSIS), kritik metod (Critic Method) və s. barədə ətraflı məlumatları diqqətə çatdırıb.
Sonda məruzə ilə bağlı fikir mübadiləsi aparılıb, suallar cavablandırılıb.
Bölmənin digər xəbərləri
