CULFADAKI “N” SAYLI HƏRBİ HİSSƏDƏ YENİ ƏSGƏR YATAQXANASI İSTİFADƏYƏ VERİLMİŞDİR
Yataqxananın açılışına və Naxçıvan Muxtar Respublikasının müdafiəsinin təşkilinin 15 illiyinə həsr olunmuş mərasimi Naxçıvan Qarnizonunun rəisi, general-leytenant Kərəm Mustafayev açmışdır.
Bildirilmişdir ki, bütün hərbi hissələrdə Azərbaycan Silahlı Qüvvələrinin müasir standartlara uyğunlaşdırılması, maddi-texniki bazasının gücləndirilməsi istiqamətində ardıcıl tədbirlər həyata keçirilir.
Muxtar respublika Ali Məclisinin sədri Vasif Talıbov demişdir ki, bu gün hərb tariximizdə, Milli Ordu quruculuğu sahəsində mühüm mərhələ olan əlamətdar bir hadisənin ildönümünü qeyd edirik. 15 il əvvəl – 1991-ci il sentyabrın 7-də ümummilli liderimiz Heydər Əliyev Naxçıvan Muxtar Respublikasının müdafiəsinin təşkili, vahid komandanlıq tərəfindən idarə olunması və təşkilatlanması sahəsində ilk əməli addım atmışdır.
Ali Məclisin sədri əlamətdar tarix münasibətilə əsgər və zabitləri, mərasim iştirakçılarını təbrik etmişdir.
Bir qrup hərbi qulluqçuya qiymətli hədiyyələr, komandir heyətinə xidməti istifadə üçün avtomobillər təqdim olunmuşdur.
Sonra iştirakçılar ikimərtəbəli əsgər yataqxanasına baxmışlar.
