DAXİLİ İŞLƏR NAZİRLİYİNDƏ KOLLEGİYA İCLASI KEÇİRİLMİŞDİR
AZƏRTAC xəbər verir ki, yanvarın 28-də Daxili İşlər Nazirliyində ötən il cinayətkarlığa qarşı mübarizənin, ictimai qaydanın və ictimai təhlükəsizliyin təmin edilməsi üzrə görülən işlərin yekununa həsr olunmuş kollegiya iclası keçirilmişdir.
Hesabat məruzəsi ilə çıxış edən daxili işlər naziri, general-polkovnik Ramil Usubov qeyd etmişdir ki, respublikanın ictimai-siyasi həyatında mühüm hadisələrlə zəngin olan 2004-cü ildə Azərbaycanın dövlətçiliyi, müstəqilliyi daha da möhkəmlənmiş, ölkəmiz beynəlxalq birliyə sürətlə inteqrasiya etmiş, milli maraqlarımız yüksək səviyyədə təmin olunmuşdur.
Ötən on il ərzində xalqımızın ümummilli lideri Heydər Əliyev tərəfindən ölkəmizdə aparılmış islahatlar Prezident İlham Əliyev tərəfindən davam etdirilərək böyük uğurlar gətirmiş, dövlətimizin iqtisadi əsaslarını əhəmiyyətli dərəcədə gücləndirmişdir. Respublika Prezidentinin rəhbərliyi ilə Azərbaycanın qüdrətli dövlətə çevrilməsi yolunda son dərəcə mühüm amil olan ictimai-siyasi sabitlik qorunub saxlanılmış, sosial tərəqqiyə, vətəndaşların həmrəyliyinə, insan hüquq və azadlıqlarının daha yüksək səviyyədə təminatına xidmət edən kompleks tədbirlər həyata keçirilmişdir.
2004-cü il iyunun 30-da dövlətimizin başçısı İlham Əliyev tərəfindən imzalanmış Fərman və Sərəncamlar daxili işlər orqanlarının fəaliyyətinə verilən yüksək qiymətin əyani təzahürü olmuşdur. Daxili işlər orqanları sistemində çalışan polis əməkdaşlarının və mülki işçilərin aylıq vəzifə maaşları iki dəfə, xüsusi təyinatlı və çevik polis nizami hissələrində isə 3 dəfə artırılmışdır. Həmin Fərmanla nazirliyin strukturunda Daxili Təhlükəsizlik İdarəsi təsis edilmişdir.
Ramil Usubov daha sonra bildirmişdir ki, “Azərbaycan Respublikasında İnsan Alverinə Qarşı Mübarizə üzrə Milli Fəaliyyət Planı”na uyğun olaraq, nazirliyin müvafiq əmrləri ilə ötən ilin may ayında Baş Mütəşəkkil Cinayətkarlıqla Mübarizə İdarəsinin strukturunda İnsan Alverinə qarşı Mübarizə İdarəsi yaradılmışdır.
Ölkəmizdə həyata keçirilən iqtisadi islahatların uğurlu nəticəsi kimi, Prezident İlham Əliyevin təşəbbüsü və imzaladığı Sərəncamla “Azərbaycan Respublikasında polis orqanlarının fəaliyyətinin təkmilləşdirilməsinə dair” xüsusi Dövlət Proqramı qəbul olunmuşdur və onun icrası üçün lazımi işlər görülür.
Cinayətkarlığa qarşı mübarizədə ictimai qaydanın təmin olunmasında son illərin müsbət təmayülü və ənənələrinin ötən ildə də davam etdirilməsi, ölkədə əhalinin hər 100 min nəfərinə düşən cinayətlərin sayının (203) MDB məkanında az olması xüsusi vurğulanmışdır.
Hesabat məruzəsində 2004-cü ildə kriminal xarakterli olmayıb inzibati məsuliyyət yaradan qanun pozuntularının vaxtında aşkara çıxarılıb müvafiq tədbirlər, beynəlxalq əməkdaşlıq sahəsində çoxtərəfli regional və ikitərəfli səviyyələrdə xeyli iş görüldüyü diqqətə çatdırılmışdır.
Ramil Usubov məruzəsində həmçinin bildirmişdir ki, “Azərbaycan Respublikasında sosial-iqtisadi inkişafın sürətləndirilməsi tədbirləri haqqında” Prezident İlham Əliyevin 24 noyabr 2003-cü il tarixli Fərmanından irəli gələn tələblərin icrası ilə əlaqədar vətəndaşların qəbulu və onların müraciətlərinə baxılması işinə ciddi diqqət yetirilmiş, bu məsələ nazirlik rəhbərliyinin daimi nəzarətində saxlanılmışdır. Hesabat dövründə həyata keçirilmiş məqsədyönlü tədbirlər nəticəsində Azərbaycan Respublikası Nazirlər Kabinetindən və Milli Məclisdən nazirliyə daxil olan müraciətlərin sayı müvafiq olaraq 2,3 dəfə və 15,5 faiz, habelə polis əməkdaşlarından şikayətlər 32,6 faiz, o cümlədən qeydiyyat və şəxsiyyət vəsiqəsi xidməti üzrə 30,7 faiz, yol polisi üzrə 22 faiz, ictimai qaydanın pozulması ilə bağlı 5,7 dəfə, obyektiv araşdırma aparılmaması ilə əlaqədar 28,4 faiz, cinayət işlərinin istintaqı ilə bağlı olan müraciətlər 34,8 faiz azalmışdır. Daxili İşlər Nazirliyində, eləcə də respublikanın müxtəlif regionlarında 512 vətəndaş qəbul edilmişdir. Bütün ərizə və şikayətlər xüsusi nəzarətə götürülmüş və onların böyük əksəriyyəti müsbət həll olunmuşdur.
Daxili İşlər naziri uğurla yanaşı, nöqsan və çatışmazlıqlardan da danışmış və bildirmişdir ki, respublikada qəsdən adamöldürmə 18, quldurluq 16, soyğunçuluq 8 fakt, ölümlə nəticələnən yol-nəqliyyat hadisələri 23,1 faiz çoxalmışdır. Narkotiklərin qanunsuz dövriyyəsinə qarşı aparılan mübarizə işinin göstəriciləri də real vəziyyəti əks etdirmir.
Hesabat məruzəsinin müzakirəsində Daxili Qoşunların komandanı general-mayor Zakir Həsənov, Naxçıvan MR daxili işlər naziri, daxili xidmət general-mayoru Əhməd Əhmədov, Bakı Şəhər Baş Polis İdarəsinin rəisi, polis general-leytenantı Məhərrəm Əliyev və başqaları çıxış etmişlər.
Kollegiya iclasına yekun vuran daxili işlər naziri, general-polkovnik Ramil Usubov qeyd etmişdir ki, polis orqanlarının qarşısında duran əsas vəzifə dövlətimizin tərəqqisi və qüdrətlənməsi, xalqın sosial rifahının yüksəldilməsi sahəsində Prezidentin Fərman və Sərəncamlarından irəli gələn tədbirləri uğurla yerinə yetirmək, ümummilli liderimiz Heydər Əliyevin tövsiyə etdiyi kimi, vətəndaşların inam və etimadını qazanaraq, xalqa və dövlətə daim sədaqətlə xidmət etməkdir.
Nazir kollegiya iştirakçıları adından Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevi əmin etmişdir ki, daxili işlər orqanlarının şəxsi heyəti ölkəmizin tərəqqisi, xalqımızın rifahının yüksəldilməsi və xoşbəxt gələcəyi naminə üzərinə düşən vəzifələri bundan sonra da layiqincə yerinə yetirərək, ictimai asayişin, hüquq qaydalarının keşiyində ayıq-sayıq dayanacaqdır.
Bölmənin digər xəbərləri
