DAXİLİ QOŞUNLAR ÖLKƏDƏ SABİTLİYİN QORUNMASINDA ƏSAS QÜVVƏLƏRDƏN BİRİNƏ ÇEVRİLMİŞDİR
Əvvəlcə, ümummilli lider Heydər Əliyevin və Vətən uğrunda gedən döyüşlərdə həlak olmuş şəhidlərin xatirəsi bir dəqiqəlik sükutla yad edilmişdir.
Məruzə ilə çıxış edən Daxili Qoşunlar Komandanının 1-ci müavini -Qərargah rəisi general-mayor Şirin Xəlilov bildirmişdir ki, müstəqilliyimizlə yaşıd olan Daxili Qoşunlar ötən dövr ərzində ölkəmizin ictimai-siyasi həyatında baş vermiş bütün proseslərin bilavasitə iştrakçısı olmuş, ciddi sınaq və çətinliklərdən dəyanətlə çıxaraq inkişaf etmişdir. Ümummilli lider Heydər Əliyevin 1995-ci il martın 9-da verdiyi Fərmanla Azərbaycan Respublikası Daxili Qoşunlarının Azərbaycanın müstəqilliyi, ərazi bütövlüyü uğrunda erməni işğalçılarına qarşı döyüşə başladıqları gün - 12 mart Daxili Qoşunlar günü elan olunmuşdur.
Qərargah rəisi qeyd etmişdir ki, Azərbaycanın ərazi bütövlüyü uğrunda döyüşlərdə qoşunlarımız da qəhrəmanlıq nümunələri göstərmiş, qurbanlar vermişdir. Ümumiyyətlə, döyüş əməliyyatları aparılan müddətdə daxili qoşunların şəxsi heyətindən 496 nəfər həlak olmuş, 1168 nəfər yaralanmış, 267 nəfər itkin düşmüşdür.
Daxili işlər naziri general-polkovnik Ramil Usubov Silahlı Qüvvələrin Ali Baş Komandanı, Prezident İlham Əliyevin bayram münasibətilə şəxsi heyətə təbriklərini və xoş arzularını çatdırmışdır.
Nazir bildirmişdir ki, ölkəmizin başçısı Azərbaycanın Silahlı Qüvvələrinin tərkib hissələrindən olan Daxili Qoşunların təkmilləşdirilməsi, professional hazırlığının yüksəldilməsi üçün daim diqqət və qayğı göstərir. O, daxili qoşunların formalaşmasında, professionallığının artırılmasında Türkiyə Respublikasının Silahlı Qüvvələri və Jandarm Komandanlığının köməyini xüsusi qeyd etmişdir.
Ramil Usubov bildirmişdir ki, daxili işlər orqanlarının ayrılmaz tərkib hissəsi olan daxili qoşunlar 14 illik çox şərəfli yol keçmişdir. Ermənistanın Azərbaycana təcavüzü zamanı daxili qoşunlar, digər hüquq-mühafizə orqanları ilə birgə, ərazilərimizin qorunmasında torpaqlarımızın işğalçılardan azad edilməsində çox böyük sücaət, rəşadət və qəhrəmanlıqlar göstərmişdir.
Ulu öndər Heydər Əliyevin daxili qoşunların inkişafına, möhkəmləndirilməsinə daim diqqət yetirdiyini, Silahlı Qüvvələrimizin formalaşmasında onun misilsiz tarixi xidmətləri olduğunu vurğulayan nazir demişdir ki, son illər gedən proseslər daxili qoşunların, onun şəxsi heyətinin ölkəmizin milli mənafeləri keşiyində ayıq-sayıq dayandığını və ölkədə daxili sabitliyin qorunmasında ən əsas qüvvələrdən birinə çevrildiyini göstərir. Daxili qoşunlar Azərbaycanda ictimai-siyasi sabitliyi pozmaq istəyən, ölkəmizi yenidən anarxiyaya sürükləyən qüvvələrə qarşı əzmkar mübarizənin önündə gedir.
Təsadüfi deyildir ki, Ali Baş Komandan daxili qoşunların xidmətlərini yüksək qiymətləndirmiş, onun rəhbərliyini və şəxsi heyətinin böyük bir hissəsini mükafatlandırmışdır. Prezidentimizin qayğısı daxili qoşunların üzərində daim var və biz o qayğını görürük.
Daxili işlər naziri Ramil Usubov vurğulamışdır ki, Prezident İlham Əliyevin apardığı daxili və xarici siyasət öz müsbət bəhrələrini verir. Ölkəmizin başçısı dəfələrlə qeyd etmişdir ki, Azərbaycanda iqtisadi yüksəliş bütün sahələrdə bir qərar üzərində qurulub, o da daxili sabitlikdir. Ölkədə daxili sabitlik olmasa, hər hansı inkişafdan söhbət gedə bilməz. Məhz bu məsuliyyəti anlayan daxili qoşunların bütün şəxsi heyəti ölkəmizin digər hüquq-mühafizə orqanları ilə çiyin-çiyinə verərək, üzərinə düşən vəzifəni uğurla yerinə yetirmiş və Azərbaycan xalqının, onun əmin-amanlığının keşiyində ayıq-sayıq dayanmışdır.
Natiq qeyd etmişdir ki, yaxın keçmişə nəzər salsaq, görərik ki, daxili qoşunlar bir çox silahlı quldur dəstələrinin zərərsizləşdirilməsində, ölkəmizdə daxili sabitliyi pozmaq istəyən dövlət çevrilişinə cəhd edən qüvvələrin qarşısının alınmasında çox böyük fədakarlıq və qəhrəmanlıq göstərmişdir. Daxili qoşunlar cinayətkarlıqla mübarizəyə də öz töhfələrini verirlər. O, daxili qoşunların bütün şəxsi heyətini əvvəlki illərdə olduğu kimi, gələcəkdə də ölkə Prezidenti ətrafında sıx birləşməyə, öz professional vəzifə borcunu yüksək səviyyədə yerinə yetirməyə çağırmışdır.
Ramil Usubov daha sonra bildirmişdir ki, daxili qoşunlar professionallıq səviyyəsini ilbəil, aybaay yüksəltməlidir. Professionallığın yüksəldilməsi üçün həm ölkəmizdəki, həm də xaricdəki təcrübə öyrənilməlidir. Daxili qoşunların şəxsi heyətinin mənəvi-psixoloji vəziyyətinin daha da yüksəldilməsi üçün işlər də uğurla davam etdirilməlidir.
O, Prezident İlham Əliyev tərəfindən daxili qoşunların 7 əməkdaşına verilən mənzillərin orderlərini və xidmətdə fərqlənmiş bir qrup hərbçiyə rütbə, diplom və medalları təqdim etmişdir.
Tədbirdə Silahlı Qüvvələrin Ali Baş Komandanı, Prezident İlham Əliyevə müraciət qəbul olunmuşdur.
Sonra kütləvi informasiya vasitələri üçün brifinq keçirilmişdir.
Tədbir iştirakçıları daxili qoşunların Xətai rayonu ərazisində yerləşən “N” saylı hərbi hissəsində təntənəli keçiddən sonra şəxsi heyətin nümunəvi çıxışları, daxili qoşunlarda istifadə edilən silah və texnika ilə, xidməti at və itlərin saxlandığı yerlərlə, eləcə də əsgər yataqxanası ilə tanış olmuşlar.
Ramil Usubov hərbi hissənin “Şərəf” kitabına urək sözlərini yazmışdır.
Tədbirdə Prezidentin hərbi təhlükəsizlik məsələləri üzrə köməkçisi general-leytenant Vahid Əliyev, Dövlət Sərhəd Xidmətinin rəisi, general-leytenant Elçin Quliyev, Müdafiə Nazirliyinin, Hərbi Prokurorluğun nümayəndələri və xarici dövlətlərin ölkəmizdəki səfirliklərinin hərbi attaşeləri iştirak etmişlər.
