Deputat: Azərbaycanın bugünkü uğurları Ulu Öndərin əsasını qoyduğu siyasətlə bağlıdır
Bakı, 14 dekabr, AZƏRTAC
Ulu Öndər Heydər Əliyevin həm SSRİ, həm də müstəqillik illərində ölkəmizə rəhbərliyi dövründə xalqın rifah halının daha da yaxşılaşdırılması, respublikamızın tərəqqisinin təmin olunması və digər istiqamətlərdə tarixi əhəmiyyətə malik misilsiz işlər görülüb. Müasir, müstəqil Azərbaycan dövlətinin memarı və qurucusu, milli həmrəylik və bütövlüyü təmin edən azərbaycançılıq ideologiyasının banisi, xalqımızın və dövlətimizin xilaskarı, Ümummilli Lider Heydər Əliyevin Azərbaycan xalqı və dövləti qarşısındakı tarixi xidmətləri misilsizdir. Onun xalqımız qarşısındakı ən böyük xidmətlərindən biri də Azərbaycan dövlətçiliyinin xilası və bunun sayəsində ölkənin siyasi tarixində yeni bir mərhələnin açılmasıdır.
Bu fikirləri AZƏRTAC-a açıqlamasında Milli Məclisin deputatı Məşhur Məmmədov deyib.
Azərbaycanın Dövlət Bayrağının təsdiq edilməsi ilə bağlı tarixi qərarın da müəllifinin məhz Ümummilli Liderimiz olduğunu vurğulayan M.Məmmədov bildirib ki, Azərbaycan Xalq Cümhuriyyətinin üçrəngli Dövlət bayrağı Naxçıvan Muxtar Respublikası Ali Məclisinin 1990-cı il noyabrın 17-də keçirilən sessiyasında ümummilli lider Heydər Əliyevin təşəbbüsü ilə Naxçıvan Muxtar Respublikasının dövlət bayrağı olaraq təsdiq edilib. Sonralar Ümummilli Lider bu barədə deyirdi: “Mən belə fikirdəyəm ki, Naxçıvan MR Ali Məclisinin qəbul etdiyi qərarlar Azərbaycan Respublikasının işinə çox təsir etdi və Azərbaycan rəhbərliyi bir neçə belə qərarın qəbul edilməsində məcburiyyət qarşısında qaldı”. Beləliklə, üçrəngli bayrağımız Naxçıvanda 1990-cı il noyabrın 17-də, Azərbaycanda isə 1991-ci il fevralın 5-də dalğalandı.
“Azərbaycanın uğurlu inkişafı, insanların rifahının daha da yüksəldilməsi naminə xalqımız 1998-ci il oktyabrın 11-də Heydər Əliyevi rəhbər seçdi. Ümummilli liderin rəhbərliyi ilə Azərbaycan öz müstəqilliyini qorudu, dövlətçiliyimizin əsasları qoyuldu, böyük iqtisadi islahatlara başlanıldı. Xalq Heydər Əliyevə inanırdı və bilirdi ki, məhz Heydər Əliyev zəkası, müdrikliyi dövləti, xalqı xoşbəxt gələcəyə apara bilər. Xalq heç vaxt yanılmır. Bu gün ölkəmizin qazandığı uğurlar, beynəlxalq aləmdə artan nüfuzu məhz Ulu Öndərin adı, onun əsasını qoyduğu siyasətlı bağlıdır, - deyə Məşhur Məmmədov vurğulayıb.
Deputat qeyd edib ki, milli ideologiyanın, azərbaycançılıq məfkurəsinin banisi Ulu Öndər Heydər Əliyevin əziz xatirəsi onu sevənlərin qəlbində əbədi yaşayacaq. O, 2023-cü ilin “Heydər Əliyev İli” elan edilməsini Heydər Əliyev irsinin daha dərindən öyrənilməsi baxımından əhəmiyyətini də qeyd edib.
Bölmənin digər xəbərləri
