Deputat: Enerji sahəsində Azərbaycan Avropanın etibarlı qaz təchizatçılarından biri kimi çıxış edir
Bakı, 10 dekabr, AZƏRTAC
Azərbaycan–Slovakiya əlaqələrinin strateji tərəfdaşlıq səviyyəsinə yüksəlməsi iki dövlət arasında münasibətlərin təkamülündə mühüm mərhələdir. Bu tərəfdaşlıq hər iki ölkənin xarici siyasət kursunda prioritet istiqamətlərdən biri kimi dəyərləndirilir və regional inteqrasiya, təhlükəsizlik, siyasi dialoq, enerji və nəqliyyat sahələrində əməkdaşlığın daha da dərinləşdirilməsinə xidmət edir. Xüsusilə Avropa İttifaqının enerji təhlükəsizliyi və regional sabitlik məsələlərində Azərbaycanın mühüm tərəfdaş kimi qəbul olunması Slovakiya ilə münasibətlərin strateji mahiyyətini artıran amillərdən biridir.
Bu fikirləri AZƏRTAC-a açıqlamasında Milli Məclisin deputatı Azər Allahverənov səsləndirib.
O qeyd edib ki, son illər ərzində ikitərəfli əlaqələrin keyfiyyətcə yeni mərhələyə keçməsi, dövlət rəhbərlərinin ardıcıl səfərləri, imzalanan sənədlər və formalaşan siyasi dialoq formatı münasibətlərin institusional çərçivəsini möhkəmləndirib. Yenilənmiş diplomatik gündəm qarşılıqlı fəaliyyətin yalnız konkret sahələrlə məhdudlaşmaması, daha geniş regional və qlobal problemlərin həllinə yönəlməsi ilə səciyyələnir. Bu mənada Slovakiya ilə strateji əməkdaşlıq Cənubi Qafqaz–Mərkəzi Avropa xəttində yeni əməkdaşlıq modellərinin formalaşmasına təkan verir.
Azər Allahverənov bildirib ki, enerji sahəsində Azərbaycan Avropanın, xüsusilə Mərkəzi Avropa məkanının etibarlı qaz təchizatçılarından biri kimi çıxış edir: “Avropa İttifaqı ölkələrinin enerji təhlükəsizliyi və mənbələrin diversifikasiyası ilə bağlı strateji sənədlərində Azərbaycanın rolu xüsusi qeyd olunur ki, bu da Slovakiya üçün alternativ enerji marşrutlarının genişlənməsi baxımından mühüm əhəmiyyət kəsb edir. Azərbaycanın Cənub Qaz Dəhlizi layihəsində aparıcı rol oynaması Slovakiya da daxil olmaqla, Avropada stabil enerji balansının qorunmasına töhfə verir. Eyni zamanda, nəqliyyat və tranzit sahəsində də tərəfdaşlıq yeni imkanlar açır. Orta Dəhliz, Bakı–Tbilisi–Qars dəmir yolu, Bakı limanı və Trans-Xəzər Logistika qovşağı Slovakiyanın Avropa logistik sistemində tutduğu mövqe ilə üst-üstə düşür. Bu marşrutlar Asiya–Avropa ticarət dövriyyəsinin sürətlənməsinə də real töhfə verir. Azərbaycan bu logistika layihələrində mühüm mühərrik rolunu oynayır və Slovakiya ilə işbirliyi yükdaşımaların coğrafiyasını genişləndirməyə yönəlir”.
Deputatın sözlərinə görə, bütün bu aspektlər göstərir ki, Azərbaycan–Slovakiya tərəfdaşlığı yalnız ikitərəfli maraqlarla məhdudlaşmır, həm də regional sabitliyin gücləndirilməsi, enerji təhlükəsizliyinin təmin olunması, iqtisadi əməkdaşlığın dayanıqlı inkişafı və mədəni əlaqələrin möhkəmləndirilməsi baxımından strateji əhəmiyyət daşıyır. Gələcək perspektivlər baxımından hər iki dövlətin qarşılıqlı siyasi iradəsi bu əlaqələrin daha da dərinləşməsinə real zəmin yaradır və tərəfdaşlığın həcmi genişləndikcə regional inteqrasiya proseslərinə müsbət təsir daha da artacaq.
Bölmənin digər xəbərləri
