İQTİSADİYYAT
Deputat: Prezident İlham Əliyevin İtaliyaya səfəri yeni əməkdaşlıq perspektivlərinin reallaşmasına töhfə verəcək
![Deputat: Prezident İlham Əliyevin İtaliyaya səfəri yeni əməkdaşlıq perspektivlərinin reallaşmasına töhfə verəcək](/files/2022/3/1200x630/16620745435094648803_1200x630.jpeg)
Bakı, 2 sentyabr, AZƏRTAC
Azərbaycan Cənubi Qafqazın güclü iqtisadiyyata malik və uğurlu beynəlxalq siyasət yürüdən ölkəsidir. Həmçinin Azərbaycan dünya coğrafiyasında Avropa ilə Asiya arasında əlaqələndirici missiyanı öz üzərinə götürüb. Bu gün dünya siyasətində baş verən dəyişikliklər və Rusiya-Ukrayna müharibəsinin gətirdiyi yeni reallıqlar Azərbaycanın müasir dünya düzənində əhəmiyyətini daha da artırıb. Ölkəmizin ərsəyə gətirdiyi nəqliyyat dəhlizləri, Xəzər dənizinin potensialından səmərəli istifadə edilməsi, Bakı-Tbilisi-Qars (BTQ) dəmir yolunun istismara verilməsi və Zəngəzur dəhlizinin açılması istiqamətində görülən işlər dünya iqtisadiyyatının böhran yaşadığı bir zamanda yaratdığımız yeni perspektivlərdir.
Bu fikirləri AZƏRTAC-a açıqlamasında Milli Məclisin deputatı Azər Badamov söyləyib.
Deputat qeyd edib ki, yeni reallıqlar fonunda Avropa İttifaqı ölkələri ilə əməkdaşlığımızda İtaliya birinci yerdə dayanır. İtaliya dünyanın ən iri iqtisadiyyatı olan 8-ci ölkədir. Eyni zamanda, “Böyük yeddilik” ölkələri ilə iqtisadi əməkdaşlıqda da birinci yerdədir. Bu ölkə Azərbaycanın Avropa İttifaqına açılan qapısıdır. Cari ildə ölkələr arasında münasibətlərin qurulmasının 30 illiyi tamam olur və belə bir əlamətdar ildə Prezident İlham Əliyev İtaliyaya səfər edib.
“Müstəqillik illərində Azərbaycan uğurlu iqtisadi siyasət yürüdərək öz enerji resurslarını beynəlxalq bazarlara çıxarmaq, həmçinin yeni ixrac marşrutlarını ərsəyə gətirmək üçün önəmli layihələrə imza atıb. İtaliya Bakı-Tbilisi-Ceyhan əsas ixrac neft boru kəmərinin (BTC) tikintisində yaxından iştirak edib və bu gün neft məhsullarına olan tələbatının 100 faizə qədərini məhz Azərbaycandan idxalla qarşılayır. İtaliya həm də Cənub Qaz Dəhlizinin ərsəyə gəlməsində dəstək verən ölkələr arasında ön sırada dayanır. Azərbaycanın “Trans-Adriatik” (TAP) qaz boru kəmərinin vaxtında reallaşması sayəsində İtaliya digər ölkələrə nisbətən enerji təhlükəsizliyini təmin etmiş ölkəyə çevrilib. Aİ ilə əldə olunmuş razılığa əsasən TAP vasitəsilə nəql olunan mavi yanacağın həcminin iki dəfəyə qədər artırılması nəzərdə tutulur. Bu proses də İtaliya bazarına ixrac etdiyimiz qazın həcminin artması deməkdir”, - deyə Azər Badamov vurğulayıb.
Milli Məclisin deputatı bildirib ki, 2020-ci ildə Prezident İlham Əliyevin İtaliyaya səfəri çərçivəsində iki ölkə arasında imzalanmış Çoxölçülü Strateji Tərəfdaşlığın gücləndirilməsinə dair Birgə Bəyannamə əməkdaşlığın möhkəmlənməsində müstəsna əhəmiyyət daşıyır: “Bu sənəd çoxşaxəli olmaqla yanaşı, iqtisadiyyatın müxtəlif sahələrində əməkdaşlığın genişləndirilməsinə hesablanıb. İmzalanmış sənədlərin uğurla icrası ölkələrimiz arasında ticarət dövriyyəsinin artmasına da müsbət təsir göstərib. Belə ki, iki ölkə arasında ticarət dövriyyəsi 2021-ci ildə 8 milyard, cari ilin 8 ayında isə 11 milyard dolları keçib. İtaliya şirkətləri ilə əməkdaşlığımız müdafiə, yüngül sənaye, energetika, yüksək texnologiyalar, kənd təsərrüfatı, tikinti və digər sahələrdə günü-gündən genişlənir. Həmçinin İtaliyanın Azərbaycanda 150-yə yaxın şirkəti fəaliyyət göstərir. Bundan əlavə, İtaliya Azərbaycan iqtisadiyyatına 530 milyon dollardan çox, Azərbaycan isə İtaliya iqtisadiyyatına 135 milyon dollar investisiya qoyub və ölkəmizin kimya və metallurgiya sənayesinin yenidən qurulmasında iştirak edir. İşğaldan azad olunmuş ərazilərimizdə Türkiyədən sonra ikinci yerdə İtaliya şirkətləri iştirak edir. Belə ki, İtaliya şirkətləri işğaldan azad edilmiş ərazilərimizdə enerji infrastrukturun yenidən qurulmasına, aqrar sahənin dirçəldilməsinə, emal sənayesinin formalaşmasına, faydalı qazıntı sənayesinin yenidən qurulmasına və turizm sektorunun inkişafına töhfə verir”.
O əlavə edib ki, dövlətimizin başçısının İtaliyaya səfəri yeni əməkdaşlıq perspektivlərinin reallaşmasına töhfə verəcək. Belə ki, səfər çərçivəsində Prezident İlham Əliyev “The European House - Ambrosetti” nüfuzlu beyin mərkəzi tərəfindən İtaliyanın Çernobbio şəhərində hər il keçirilən beynəlxalq forumda əsas qonaq kimi iştirakı nəzərdə tutulur və “Enerji təhlükəsizliyinin təmin olunmasında Azərbaycanın rolu” mövzusunda çıxış edəcəyi gözlənilir: “Hesab edirəm ki, forumda iştirak edən Avropanın aparıcı şirkətləri Azərbaycan iqtisadiyyatına investisiya yatırmaq istəklərini bildirəcəklər”.
Azər Badamov vurğulayıb ki, bu gün Azərbaycan siyasi sabitliyini təmin edən, dinamik iqtisadiyyata malik olan ölkədir. Həm də Azərbaycan etibarlı tərəfdaş kimi imzalanmış müqavilələrin icrasında məsuliyyətli olduğunu sübut edib. Bundan əlavə, ölkəmizlə əməkdaşlıq edən beynəlxalq tərəfdaşlar fayda görürlər. Bu gün ölkəmizin investisiya mühiti çox faydalıdır və beynəlxalq investorlar üçün də əlverişlidir. Dövlətimizin başçısının İtaliyaya səfəri həm ölkələrimiz arasındakı münasibətlərin daha da möhkəmlənməsinə, həm də Avropa İttifaqı ölkələri ilə əməkdaşlığımızın genişləndirilməsinə təkan verəcək.