Dəyərli bəstəkarımızın yubileyinə Məktəb-studiya şagirdlərinin ərməğanı
Bakı, 14 dekabr, AZƏRTAC
Üzeyir Hacıbəyli adına Bakı Musiqi Akademiyasının orta ixtisas musiqi məktəb-studiyası Fikrət Əmirovun 100 illik yubileyinə həsr olunmuş konsert təşkil edib.
AZƏRTAC xəbər verir ki, tədbirdə musiqişünas, məktəb-studiyanın böyük elmi işçisi və müəllimi Şəfəq Hacıyeva çıxış edərək dəyərli bəstəkar Fikrət Əmirovun yaradıcılığı və onun musiqi mədəniyyətimizdəki əhəmiyyətli rolundan söz açıb. F.Əmirovun yaradıcı irsindən söhbət açan musiqişünas belə tədbirlərin əhəmiyyətindən danışıb.
Konsertdə bəstəkarın fortepiano üçün “12 miniatür” silsiləsindən “Barkarola”, “Marş”, “Aşıqsayağı”, variasiyalar, I və II ekspromtlar, habelə fortepiano və violin üçün Ballada, “Xatirə” kimi əsərlər, həmçinin “Azərbaycan dağlarında” və “Aşıqsayağı” əsərləri məktəb-studiyanın şagirdləri tərəfindən səsləndirilib. Konsertdə solo nömrələrlə yanaşı, ansambl nümunələri də ifa olunub.
Bəstəkarın 100 illik yubileyinə həsr olunmuş konsert proqramında onun “Lay-lay”, “Baharımsan”, “Səhər” kinofilmindən Aslanın mahnısı, ilk lirik-psixoloji operamız olan “Sevil”dən Dilbərin ariyası kimi məşhur nömrələr də dinləyicilərə təqdim edilib.
Bölmənin digər xəbərləri
