Domeniko Koko: Azərbaycandakı multikultural mühit çox önəmli bir dəyərdir
Roma, 24 mart, AZƏRTAC
İtaliyanın “İl Metropolitano” qəzetinin saytında Azərbaycanın Siciliya və Kalabriya regionlarındakı fəxri konsulu Domeniko Kokonun Azərbaycan-İtaliya əlaqələri, ölkəmizin mədəni irsinin və iqtisadi inkişafının İtaliyada təbliği və bu kimi digər məsələlərdən bəhs edən müsahibəsi yerləşdirilib.
D.Koko diqqətə çatdırır ki, Azərbaycanın mədəni, iqtisadi, turizm və digər sahələrdə potensialını İtaliyada təbliğ etmək, eyni zamanda, ölkələrimizin müxtəlif bölgələri arasında münasibətləri daha da dərinləşdirmək istiqamətində önəmli tədbirlər həyata keçirilir.
Ölkələrimiz arasında əlaqələrin müxtəlif istiqamətlərinə toxunan və əməkdaşlığın inkişafı üçün geniş potensialın mövcudluğunu vurğulayan D.Koko deyib: “Bölgələrimiz arasındakı münasibətlər sürətlə inkişaf edir. Buna bir sıra şəhərlərimizin qardaşlaşması, ortaq maraq doğuran layihələrin həyata keçirilməsi nümunə ola bilər. 2014-cü ildə “Azərbaycan Respublikası ilə İtaliya Respublikası arasında strateji tərəfdaşlıq haqqında Birgə Bəyannamə”nin qəbul edilməsindən sonra iki ölkə arasında əlaqələr daha yüksək səviyyəyə qalxıb. Əminəm ki, növbəti illərdə TAP layihəsinin reallaşması ilə bu əlaqələr daha da genişlənəcək. Azərbaycan, eyni zamanda, qeyri-neft sektorunda da İtaliya üçün əlverişli bazara malikdir. Bütün bunları nəzərə alaraq, hər iki ölkə üçün faydalı ola biləcək layihələrin reallaşdırılması istiqamətində biznes forumların və missiyaların təşkilinə töhfə verməkdən məmnunluq duyuram”.
Fəxri konsul Siciliya bölgəsinin iş adamlarının Azərbaycan ilə biznes əlaqələri qurmaqda maraqlı olduqlarını bildirib, bu xüsusda həyata keçirilməsi planlaşdırılan tədbirlər barədə danışıb. Qeyd edib ki, Azərbaycan təkcə iqtisadi inkişafı və İtaliyanın önəmli ticarət tərəfdaşı olması baxımından deyil, həmçinin zəngin mədəni irsinə görə də tanınır. Onun beynəlxalq aləmdə önəmli xarakterik cəhətlərindən biri multikultural və çoxkonfessiyalı ölkə olmasıdır. Əhalisinin əksəriyyəti müsəlman olan Azərbaycanda müxtəlif dinlərin nümayəndələri sülh şəraitində birgə yaşayırlar. Burada bütün dinlərin nümayəndələrinə hörmətlə yanaşılır və onların hüquqları bərabər səviyyədə qorunur. Müxtəlif dinlərin təmsilçilərinə konstitusional səviyyədə heç bir fərq qoyulmur. Bu, çox önəmli bir dəyərdir. Tarixin müxtəlif dövrlərində olduğu kimi, hazırda da Azərbaycanda dini səviyyədə heç bir qarşıdurma yaşanmır. Azərbaycan multikulturalizmin və mədəniyyətlərarası dialoqun beynəlxalq səviyyədə təbliği kimi önəmli bir missiyanı həyata keçirir və müvafiq sahələrdə əhəmiyyətli tədbirlərə ev sahibliyi edir. Bu sırada cari il aprelin 25-dən 27-dək Bakıda keçiriləcək BMT-nin Sivilizasiyalar Alyansının 7-ci Qlobal Forumunu vurğulamaq yerinə düşər.
Ermənistan-Azərbaycan münaqişəsinə toxunan D.Koko diqqətə çatdırıb ki, bu münaqişə dini zəmində baş verməyib. İki ölkə arasında gərginliyin səbəbi Ermənistanın Azərbaycana qarşı ərazi iddiaları irəli sürməsi ilə bağlıdır. İyirmi ildən artıqdır ki, Ermənistan Dağlıq Qarabağ bölgəsi və ona bitişik yeddi rayon daxil olmaqla Azərbaycanın beynəlxalq birlik tərəfindən tanınmış ərazilərinin 20 faizini işğal edib. Münaqişə nəticəsində bir milyondan çox azərbaycanlı qaçqın və məcburi köçkünə çevrilib. Təəssüf ki, BMT Təhlükəsizlik Şurasının Ermənistan silahlı qüvvələrinin işğal olunmuş Azərbaycan ərazilərindən çıxarılmasını, qaçın və məcburi köçkünlərin doğma yurdlarına geri dönməsini nəzərdə tutan 4 qətnaməsinə Ermənistan hələ də məhəl qoymur.
Azərbaycanın İtaliyada təbliği istiqamətində Heydər Əliyev Fondunun fəaliyyəti ilə bağlı sualı cavablandıran D.Koko deyib ki, 2004-cü ildə təsis olunmuş qurum təhsil, səhiyyə, mədəniyyət, idman, elm və texnologiya, ətraf mühit və digər sahələrdə önəmli layihələr həyata keçirməklə sosial və iqtisadi inkişafa töhfə verir. Fond bu ölkənin zəngin mədəni irsinin İtaliyada təbliği istiqamətində Azərbaycanın birinci xanımı Mehriban Əliyevanın rəhbərliyi ilə bir sıra mədəni tədbirlər həyata keçirir. Digər tərəfdən, qurum İtaliyada tarixi irsin qorunmasına da önəmli töhfələr verir. Bu sırada Fondun dəstəyi ilə Müqəddəs Marçellinio və Pietro katakombalarının bərpasını xüsusi vurğulamaq lazımdır. Müsəlman ölkəsinin xristian aləmində əhəmiyyətli yeri olan abidələrin qorunmasına göstərdiyi dəstək yüksək qiymətləndirilir.
Maqsud Dadaşov
AZƏRTAC-ın xüsusi müxbiri
Roma
Bölmənin digər xəbərləri
