Dominik dö Vilpən: Vergiləri artırmayacağını vəd edən prezidentliyə namizədlər yalan danışırlar
Paris, 17 iyul, AZƏRTAC
Fransanın keçmiş Baş naziri və 2027-ci il prezident seçkilərinə mümkün namizədlərdən biri hesab edilən Dominik dö Vilpən ölkənin maliyyə vəziyyətini nəzərə alaraq, gələcək hakimiyyətin vergiləri artırmaq məcburiyyətində qalacağını bildirib. Onun fikrincə, bunun əksini vəd edən siyasətçilər seçiciləri aldadırlar.
AZƏRTAC xəbər verir ki, Dö Vilpən bu fikirləri bir neçə media orqanı, eləcə də AFP və sosial media influenserlərinin iştirak etdiyi mətbuat konfransında səsləndirib.
“Hamı demək istərdi ki, “biz vergiləri artırmayacağıq”, – deyə o bildirib. Lakin keçmiş Baş nazir əlavə edib: “Seçiləcək hər kəs vergiləri artıracaq, məsələ bu qədər sadədir. Deməli, ya yalan danışanlar var, ya da həqiqəti əvvəlcədən deməyə çalışanlar”.
Onun sözlərinə görə, vergilərin artırılmayacağını iddia etmək Fransanın qarşısında duran maliyyə problemlərinin miqyasını görməməzlikdən gəlmək deməkdir.
Jak Şirak hökumətində Baş nazir olmuş Dominik dö Vilpən növbəti prezidentlik müddətinin sonuna qədər büdcə kəsirinin ümumi daxili məhsulun (ÜDM) 3 faizindən aşağı salınmasını qarşıya məqsəd kimi qoyduğunu bildirib. Dö Vilpən, həmçinin imkanlı vətəndaşların daha çox maliyyə yükü daşımalı olduğunu vurğulayıb. O, 2018-ci ildə ləğv edilən Sərvət Vergisinin (ISF) yenilənmiş formada bərpasını dəstəklədiyini açıqlayıb.
“Bizə elə bir vergi lazımdır ki, ən varlı insanlar nümunə göstərsinlər. Çünki əsas yükün ən böyük hissəsini də məhz onlar daşımalıdır”, – deyə o bildirib.
Bununla yanaşı, keçmiş Baş nazir sol siyasi qüvvələrin bəzi təkliflərini də tənqid edib.
Onun fikrincə, bəzi sol partiyalar yeganə çıxış yolunun sadəcə varlılardan daha çox pul almaq olduğunu düşünməklə məsuliyyətsizlik nümayiş etdirirlər.
Mətbuat konfransı zamanı Dominik dö Vilpən Fransanın iqtisadi müstəqilliyini gücləndirmək üçün böyük milli suveren fondun yaradılmasını da təklif edib.
Onun fikrincə, bu fond fransızların şəxsi yığımlarını iqtisadiyyatın strateji sahələrinə yönəltməyə imkan verə bilər. “Biz proteksionist olmağa razılaşmalıyıq”, – deyə o bildirib və milli kapitalın ölkə daxilində daha səmərəli istifadə edilməsinin vacibliyini vurğulayıb.
Bu seçimlə bağlı sualı cavablandıran siyasətçi ənənəvi KİV-ləri “qısqanclıq nümayiş etdirməməyə” çağırıb. Onun sözlərinə görə, bu gün fransızlar xəbərləri əvvəlki kimi yalnız klassik media vasitəsilə almırlar və sosial şəbəkələrin rolu əhəmiyyətli dərəcədə artıb. “İnsanlar artıq informasiyanı fərqli şəkildə istehlak edirlər. Bu müxtəlif səsləri nəzərə almaq vacibdir”, – deyə o bildirib.
Dominik dö Vilpən qeyd edib ki, onun yanaşması radikal solçu siyasətçi Jan-Lük Melenşonun tətbiq etdiyi modeldən fərqlənir. “Mən həm ənənəvi medianı, həm də yeni medianı dəvət edirəm. Mən insanları bir araya gətirirəm. Fərqimiz də məhz budur”, – deyə o vurğulayıb.
Hazırda yüksək şəxsi populyarlığa malik olsa da, seçki sorğularında aşağı nəticələr göstərən Dominik dö Vilpən hələlik prezidentliyə namizədliyini rəsmi şəkildə elan etməyib. Onun yaxın ətrafının məlumatına görə, belə bir açıqlamanın payız aylarında verilməsi gözlənilir.
Bölmənin digər xəbərləri
