İQTİSADİYYAT
Dövlət orqanları 650-dən çox məlumatı vətəndaşlar üçün açıq edib
Bakı, 21 noyabr, Elvira Məmmədova, AZƏRTAC
Dövlət orqanları 650-dən çox məlumatı vətəndaşlar üçün açıq edib.
AZƏRTAC xəbər verir ki, bu barədə noyabrın 21-də Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzi tərəfindən yaradılan “www.data.gov.az”ın yeni versiyasının təqdimatında nəqliyyat, rabitə və yüksək texnologiyalar nazirinin müavini Elmir Vəlizadə məlumat verib.
E.Vəlizadə Açıq Məlumatların Elektron hökumət quruculuğunda yeni bur inkişaf mərhələsi olduğunu qeyd edib. O bildirib ki, "www.data.gov.az" portalı vasitəsilə vətəndaşlar və biznes strukturları dövlət orqanları tərəfindən yaradılan və açıq elan edilən məlumatlardan asanlıqla istifadə edə biləcəklər.
Hər bir qurumun öz səlahiyyəti çərçivəsində zəruri bildiyi məlumatları müəyyənləşdirilmiş texniki şərtlərə uyğun olaraq açıq etməlidir.
“Bu açıq bir prosesdir və hər bir dövlət qurumu öz məlumatlarını portalda əks etdirməklə vətəndaşlara çatdıra bilər. Nəqliyyat, Rabitə və Yüksək Texnologiyalar Nazirliyi bu prosesdə hər birinizə yardımçı olmağa hazırdır. Çalışmaq lazımdır ki, portalımız daha zənginləşsin, məlumatların sayı çoxalsın. Eyni zamanda, təmsil olunan bütün dövlət qurumları da burada öz məlumatları ilə çıxış etsinlər”, - deyə E.Vəlizadə bildirib.
Tədbirdə çıxış edən Dövlət Statistika Komitəsi sədrinin müavini Rauf Səlimov, mədəniyyət və turizm nazirinin müavini Nazim Səmədov, əmək və əhalinin sosial müdafiəsi nazirinin müavini İdris İsayev portalın fəaliyyətini yüksək qiymətləndirib, təmsil etdikləri dövlət qurumlarının gələcəkdə portalın genişləndirilməsi və zənginləşdirilməsi işinə töhfə verəcəklərini vurğulayıblar.
Sonra Açıq Hökumət Məlumatları portalının yeni versiyası təqdim olunub. Məlumat Hesablama Mərkəzinin şöbə müdiri Cəmşid Naxçıvanski bildirib ki, portalın yeni versiyasında açıq məlumatların sayı artırılıb. Daha əvvəl "www.data.gov.az"da 25 məlumat var idisə, hazırda 650-dən çox məlumat vətəndaşlar üçün əlçatan olub. Mövcud qanunvericiliyə uyğun olaraq təqdim edilən açıq məlumatlar bundan sonra müntəzəm olaraq yenilənəcək və təkmilləşdiriləcək”, - deyə C.Naxçıvanski bildirib.
Qeyd edək ki, bu məlumatlar “Azərsu” ASC, Dövlət Gömrük Komitəsi, Dövlət Statistika Komitəsi, Ədliyyə Nazirliyi, Əmək və Əhalinin Sosial Müdafiəsi Nazirliyi, Əmlak Məsələləri Dövlət Komitəsi, Kənd Təsərrüfatı Nazirliyi, Mədəniyyət və Turizm Nazirliyi, Nəqliyyat, Rabitə və Yüksək Texnologiyalar Nazirliyi tərəfindən təqdim edilib.
“Elektron hökumət” portalına xidmətləri inteqrasiya olunan dövlət qurumlarının nümayəndələri və startapçılar iştirak etdikləri tədbirdə, həmçinin Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzi tərəfindən elan edilən “Bax, istifadə et və yarat” adlı müsabiqə barədə məlumat verilib.
Bildirilib ki, İKT mütəxəssisləri, startapçılar, tələbələr üçün nəzərdə tutulan müsabiqə çərçivəsində “www.data.gov.az” portalının Açıq Hökumət Məlumatlarından istifadə etməklə ictimai əhəmiyyətli mobil əlavələrin yaradılması nəzərdə tutulur.
Müsabiqənin məqsədi Azərbaycan Respublikasının “Açıq Hökumət Məlumatları” (www.data.gov.az) portalındakı məlumatlar əsasında yeni mobil tətbiqlərin hazırlanması, Açıq Hökumət Məlumatlarından rahat istifadə, sosialyönümlü və innovativ ideyaların dəstəklənməsi və startap layihələrinin təşviq edilməsidir.