Bərdə, 13 fevral, Tahir Ağaməmmədov, AZƏRTAC

Təhsil sisteminin yenidən qurulması, böyüyən nəslin yüksək şəraitə, zəruri infrastruktura malik təhsil müəssisələrində oxuması dövlət siyasətinin prioritet istiqamətlərindən biridir. Təhsilin keyfiyyətinin yüksəldilməsində məktəb infrastrukturunun inkişafı böyük əhəmiyyət kəsb edir. Odur ki, respublikamızda yeni ümumi təhsil məktəblərinin tikintisi, mövcud məktəblər üçün əlavə korpusların inşası, onların əsaslı təmiri, müasir avadanlıqla təminatı, istilik sisteminin bərpası, ümumilikdə, infrastrukturun yenilənməsi daim diqqət mərkəzində saxlanılır.

Prezident İlham Əliyevin sədrliyi ilə “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransda sosial-iqtisadi inkişafın nəticələrini təhlil edən dövlət başçısı deyib: "Keçən il sosial infrastrukturun yaradılması ilə bağlı önəmli addımlar atıldı - 84 məktəb, 60 tibb müəssisəsi tikildi və təmir edildi. Ona görə bu proses də daim gedir. Biz məktəblərin böyük hissəsinin təmirini başa çatdırmışıq. Amma hələ də qəzalı vəziyyətdə olan məktəblər var və onların da təmiri ilə bağlı gələcək illərdə konkret addımlar atılacaqdır".

Respublikamızın hər yerində olduğu kimi, Bərdə rayonunda da təhsil müəssisələrinin maddi-texniki bazasının möhkəmləndirilməsi, yeni məktəb binalarının inşası, mövcud məktəblərin əsaslı təmiri istiqamətində mühüm işlər görülüb. Bərdə Rayon Təhsil Şöbəsindən AZƏRTAC-ın bölgə müxbirinə bildiriblər ki, son 10 ildə rayonda 4100 şagird yerlik 15 məktəb binası inşa edilib, 20-dən artıq məktəb əsaslı təmir olunub. Hazırda Bərdə şəhər 4 nömrəli tam orta məktəbi üçün 624 şagird yerlik, 2 nömrəli tam orta məktəb üçün 1200 şagird yerlik yeni binalar inşa edilir.

Son illərdə modul tipli məktəblərin quraşdırılması da həyata keçirilir. 2018-2019-cu illərdə rayonun Qaratəpə, Hacılar, İmamqulubəyli, Nəcəfqulubəyli, Böyük Qacar və Təhlə kəndlərində modul tipli məktəblər qurularaq istifadəyə verilib. Nazırlı kənd 2 nömrəli və Ərəblər kənd tam orta məktəbləri üçün quraşdırılan modul tipli binalar da tezliklə müəllim və şagirdlərin istifadəsinə veriləcək.

Dövlət qayğısı təhsildə keyfiyyətin yüksəldilməsinə zəmin yaradır, yeni uğurlara yol açır. Təhsilin inkişafına göstərilən diqqətin nəticəsidir ki, rayon üzrə ali məktəblərə qəbul olan gənclərin sayı hər il artır. Təkcə ötən il rayonun orta ümumtəhsil məktəblərini bitirən 1145 nəfər məzundan 810 nəfəri ali məktəblərə qəbul olmaq üçün sənəd verib, 561 nəfər ali, 184 nəfər orta-ixtisas məktəblərinə qəbul olub. Qəbul imtahanlarında məzunlardan 115 nəfəri 500-dən yuxarı, o cümlədən 34 nəfəri 600-dən çox bal toplayıb.