Dünya Ətraf Mühitin Mühafizəsi Gününə həsr olunmuş seminar keçirilmişdir
Bakı, 5 iyun (AZƏRTAC). İyunun 5-də Azərbaycan Respublikası Dövlət Neft Şirkətinin (ARDNŞ) Təlim,Tədris və Sertifikatlaşdırma İdarəsində (TTSİ) Dünya Ətraf Mühitin Mühafizəsi Gününə həsr olunmuş seminar keçirilmişdir.
AZƏRTAC xəbər verir ki, seminarda 1972-ci il iyunun 5-də BMT Baş Məclisinin İsveçin paytaxtı Stokholmda keçirilən iclasında ətraf mühitin mühafizəsi məsələsi diqqət mərkəzində olmuş, problemin kəskinliyini, əhali arasında ekoloji şüurun yüksəldilməsini, ətraf mühitin mühafizəsi problemlərinə diqqətin yönəldilməsinin vacibliyini nəzərə alan iştirakçılar bu günün Dünya Ətraf Mühit Günü kimi qeyd olunmasına qərar vermişlər.
Seminarda atmosferin, su hövzələrinin, torpaqların çirklənməsi, tullantıların idarə olunması, qlobal istiləşmə, turş yağışlar, ozon qatının pozulması, ARDNŞ-in ekoloji siyasəti mövzuları ətrafında geniş məlumat verilmişdir.
Bildirilmişdir ki, seminarın təşkil olunmasında əsas məqsədi bu sahədə çalışan müvafiq qurumların və işçilərin ekoloji biliklərini artırmaqla yanaşı, təhlükəli tullantıların zərərsizləşdirilməsi, ekoloji maarifləndirmə məsələlərini və dünyada ekoloji problemlərin yaranmasının səbəblərini və həlli yollarını onlarla birlikdə müzakirə etməkdir. Seminarda o da qeyd olunmuşdur ki, ilin sonunadək ətraf mühitin mühafizəsi, neft və neft məhsulları ilə çirklənmiş ərazilərin təmizlənməsi, ekoloji vəziyyətin yaxşılaşdırılması istiqamətində TTSİ-də yeni kursların təşkil olunması nəzərdə tutulmuşdur.
Bölmənin digər xəbərləri
