Əbu-Dabidə 34-cü Beynəlxalq Kitab Sərgisi keçirilir
Qahirə, 28 aprel, AZƏRTAC
Birləşmiş Ərəb Əmirliklərində (BƏƏ) 34-cü ənənəvi Əbu-Dabi Beynəlxalq Kitab Sərgisi öz işinə başlayıb. BƏƏ Prezidenti Şeyx Məhəmməd bin Zayed Al Nəhyanın himayəsi altında təşkil olunan sərgiyə 96 ölkədən 1400 nəşriyyat qatılıb.
AZƏRTAC xəbər verir ki, “Bilik cəmiyyəti. Cəmiyyətin biliyi” şüarı altında baş tutan sərginin hədəfi dünya ölkələri arasında mədəni və elmi mübadiləni gücləndirmək, kitaba olan marağı artırmaqdır.
Builki sərginin əsas siması bəşəriyyətə verdiyi dəyərli elmi töhfələrinə, tibb sahəsində xidmətlərinə ehtiram əlaməti olaraq ensiklopedik alim İbn Sina seçilib. Sərgi çərçivəsində İbn Sinanın 1000 il əvvəl yazdığı “Tibbə dair qanun” (əl-Qanun fit-Tıbb) kitabına həsr olunan “İbn Sina həkim kimi: “Tibbə dair Qanun”dan müasir müalicələrə qədər” adlı sessiya keçiriləcək. Sessiyada “Tibbə dair qanun” kitabı və bu əsərin qiymətləndirdiyi elmi və humanist dəyərlər müzakirə olunacaq.
Mayın 5-dək davam edəcək sərgi çərçivəsində müxtəlif tədbirlər, o cümlədən şeir axşamları, seminarlar, imza mərasimləri, yazarlarla görüş təşkil olunacaq.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
