ƏFSANƏVİ TENNİSÇİ BORQUN MÜKAFATLARI KOLLEKSİYASINI AQASSİ ALACAQ
AZƏRTAC-ın xəbər verdiyi kimi, maliyyə çətinlikləri çəkən dünyaşöhrətli İsveç tennisçisi Börn Borq ailəsini birtəhər dolandırmaq üçün kubok və mükafatlarını hərraca çıxarmağı qərara almışdır. Bundan xəbər tutan tanınmış Amerika tennisçisi Andre Aqassi bildirmişdir ki, Londonda keçirilən ənənəvi Uimbldon turniri qalibinin 5 Kubokunu almaq niyyətindədir. Qeyd edək ki, Aqassi kubokları şəxsi kolleksiyası üçün deyil, muzeylərdən birinə bağışlamaq üçün almaq istəyir. Amerikalı öz mövqeyini belə izah etmişdir: “Udmadığı halda heç kəs Uimbldon qalibi Kubokunun sahibi ola bilməz. Mən Borqu qınamıram, lakin kiminsə çoxlu pulu olduğuna görə bu qəniməti ələ keçirmək fikri xoşuma gəlmir. Axı, Uimbldon çox mötəbər turnirdir”.
Aqassi mükafatların idmana yaxın olan adamlardan ibarət qrup tərəfindən alınmasına da razı ola bilər, bir şərtlə ki, kuboklar sonda muzeyə təhvil verilsin.
Borq kolleksiyası üçün 500 min dollar almaq niyyətindədir.
Bölmənin digər xəbərləri
