“Ekoloji təmiz məhsul və aqrobiomüxtəlilik” mövzusunda məktəblilərin Respublika müsabiqəsi keçirilir
Bakı, 21 may, AZƏRTAC
Təhsil Nazirliyi Respublika Ekoloji Tərbiyə və Təcrübəçilik Mərkəzinin, Kənd Təsərrüfatı Nazirliyinin, Ekologiya və Təbii Sərvətlər Nazirliyinin birgə əməkdaşlığı ilə “Ekoloji təmiz məhsul və aqrobiomüxtəlilik” mövzusunda məktəblilərin ilk dəfə respublika müsabiqəsinə start verilib.
Müsabiqənin əsas məqsədi Azərbaycanın aqrobiomüxtəlifliyinin qorunması və ekoloji təmiz kənd təsərrüfatı məhsullarının istehsalında məktəblilərin fəal iştirakının təmin edilməsi, bu sahədə onların bilik və bacarıqlarının artırılmasıdır. Müsabiqədə “Meyvəçilik”, “Arıçılıq”, “Heyvandarlıq”, “Meşə məhsulları”, “Tərəvəzçilik”, “Suptropik bitkilər”, “Gülçülük”, “Dənli bitkilər”, “Balaca fermer” nominasiyaları üzrə ümumi təhsil və internat məktəblərinin V-XI sinif şagirdləri, məktəbdənkənar təhsil müəssisələrinin dərnək üzvləri iştirak edirlər.
Müsabiqənin zona mərhələsinə artıq Göyçayda başlanılıb. Zona mərhələsində müsabiqə iştirakçılarının təcrübə işinə aid elektron təqdimatları keçiriləcək, onların müşahidə gündəlikləri, məhsul nümunələri təqdim olunacaq. Oktyabr ayında keçiriləcək respublika mərhələsində isə mövsümə uyğun olaraq ən yaxşı məhsul nümunələri “Ekoloji təmiz məhsul və aqrobiomüxtəliflik” yekun sərgisində nümayiş etdiriləcək. Görülən işlər münsiflər heyəti tərəfindən qiymətləndiriləcək və ən yaxşı təcrübə işləri final mərhələsinə vəsiqə alacaq.
Müsabiqənin zona mərhələsinin bütün iştirakçılarına sertifikat təqdim olunacaq. Respublika mərhələsinin qalibləri isə Təhsil Nazirliyi tərəfindən diplom və hədiyyələrlə mükafatlandırılacaq.
Bölmənin digər xəbərləri
