Ekspert: Əhali daşqınlar zamanı həyata keçirilən tədbirlər barədə məlumatlı olmalıdır
Bakı, 29 may, AZƏRTAC
Azərbaycanda daşqınlar, əsasən, yaz və payız aylarında, atmosfer yağıntılarının artdığı dövrlərdə baş verir. Bu zaman ölkənin demək olar ki, bütün çaylarında daşqın riski yüksək olur. Xüsusilə Böyük Qafqazın cənub yamaclarında yerləşən Kişçay, Şinçay, Dəmiraparançay və Girdimançay kimi çaylarda baş verən daşqınlar çox zaman dağıdıcı sellərlə müşayiət edilir.
Bu fikirləri son vaxtlar bəzi çaylarda sululuğun artması ilə bağlı AZƏRTAC-a açıqlamasında Ekologiya və Təbii Sərvətlər Nazirliyi yanında İctimai Şuranın üzvü, ətraf mühit məsələləri üzrə ekspert Rövşən Abbasov bildirib.
Rövşən Abbasov, həmçinin qeyd edib ki, Kür çayında daşqınlar həmişə baş verib və bu proseslər gələcəkdə də davam edə bilər. Əsas daşqın zonaları isə Kürün mənsəb hissəsində yerləşən Kürdəmir, Zərdab, Salyan, Neftçala rayonları və Şirvan şəhəri ətrafında müşahidə olunur. “Daşqınlara qarşı mübarizədə yalnız mərkəzi və yerli hökumət orqanlarının deyil, yerli əhalinin və icmaların da fəal iştirakı vacibdir. Əhali bu sahədə məlumatlı olmalı, daşqınların fəlakətə çevrilməməsi üçün icma səviyyəsində müxtəlif tədbirlər barədə biliklərə malik olmalıdır”, – deyə ekspert vurğulayıb.
Bölmənin digər xəbərləri
