Elektron-tibb mühitində qərarların qəbulunun dəstəklənməsi üzrə tədqiqatlar davam etdirilir
Bakı, 23 noyabr, AZƏRTAC
İnformasiya Texnologiyaları İnstitutunun 2020-ci il üzrə illik hesabatı müzakirə olunub.
İnstitutdan AZƏRTAC-a bildirilib ki, hesabatı təqdim edən şöbə müdiri, AMEA-nın müxbir üzvü, texnika elmləri doktoru, professor Məsumə Məmmədova süni intellekt və sosioinformasiya texnologiyaları problemləri istiqamətində elektron tibb mühitində qərarların qəbul olunmasını dəstəkləyən model və metodların işlənilməsi üzrə tədqiqatlar aparıldığını bildirib. Qeyd olunub ki, şöbənin əməkdaşları tərəfindən “Web of Science” (Clarivate Analytics), “Scopus” və digər beynəlxalq bazalarda indeksləşən jurnallarda 9 məqalə dərc olunub.
Professor, həmçinin beynəlxalq elmi əməkdaşlıqla əlaqədar görülən işlərdən söz açıb, bu qəbildən keçirilən onlayn seminarlarda müzakirə edilən mövzuların aktuallığını və ölkəmiz üçün əhəmiyyətini diqqətə çatdırıb.
AMEA-nın vitse-prezidenti, institutun direktoru, akademik Rasim Əliquliyev şöbənin hesabatına dair tövsiyələrini səsləndirib, e-tibbin çoxaspektli problemləri ilə bağlı uğurlu nəticələr alındığını bildirib, tədqiqatların daha da dərinləşdirilməsinin zəruriliyini vurğulayıb.
Bölmənin digər xəbərləri
