ƏMƏK VƏ ƏHALİNİN SOSİAL MÜDAFİƏSİ NAZİRLİYİ ÖTƏN İLƏ YEKUN VURMUŞDUR
AZƏRTAC xəbər verir ki, yanvarın 29-da Əmək və Əhalinin Sosial Müdafiəsi Nazirliyində 2004-cü ilin yekunları və 2005-ci ildə qarşıda duran vəzifələrlə bağlı kollegiya iclası keçirilmişdir.
İclasda çıxış edən əmək və əhalinin sosial müdafiəsi naziri Əli Nağıyev hesabat dövründə əməyin ödənilməsi, əmək münasibətləri və əməyin mühafizəsi sahəsində qanunvericiliyin təkmilləşdirilməsi, müvafiq normativ-hüquqi aktların layihələrinin hazırlanması, əmək qanunvericiliyinin tətbiqi ilə əlaqədar praktiki işlərin yerinə yetirilməsi ilə bağlı məsələlərin, habelə bu sahələrdə respublikanın nazirlik, müəssisə və təşkilatlarına metodik kömək göstərilməsinin nazirliyin əsas fəaliyyət istiqamətlərindən biri olduğunu bildirmişdir.
Hesabat dövründə həm büdcədən maliyyələşdirilən, həm də digər təşkilatlarda çalışan işçilərin əmək haqlarının artırılması üzrə geniş təhlillərin aparıldığını, maliyyə, ədliyyə və digər aidiyyəti nazirliklərlə birlikdə təkliflər hazırlanaraq, Nazirlər Kabinetinə təqdim olunmuşdur. Azərbaycan Respublikası Prezidentinin müvafiq fərmanı ilə 2004-cü ilin iyulun 1-dən respublikada minimum əmək haqqının məbləği 1,7 dəfə artırılaraq 60 min manatdan 100 min manata çatdırılmışdır. Bu, qeyri-büdcə təşkilatlarında çalışan işçilərin maaşlarının da artmasına şərait yaratmışdır. Belə ki, ilkin hesablamalara görə, 2004-cü ilin yanvar-dekabr aylarında respublika üzrə orta aylıq əmək haqqının səviyyəsi 483 min manat təşkil etmişdir ki, bu da 2003-cü illə müqayisədə 26 faizdən artıqdır.
Əməyin mühafizəsi üzrə qanunvericiliyin yerlərə çatdırılması və izah edilməsi məqsədi ilə Bakı, Lənkəran və Bərdə şəhərlərində işəgötürənlərlə zona müşavirələri keçirilmişdir. İşəgötürənləri və müəssisələrdə əməyin mühafizəsi işçilərini əməyin mühafizəsi sahəsində müasir normalar, qaydalar və standartlarla, habelə mövcud beynəlxalq təcrübə ilə tanış etmək üçün nazirliyin nəzdində fəaliyyət göstərən Dövlət Əmək Müfəttişliyində əməyin mühafizəsi üzrə informasiya mərkəzi yaradılmışdır. Müfəttişlik əsas fəaliyyətini müəssisə və təşkilatlarda əmək qanunvericiliyinə əməl olunmasına nəzarət edilməsinə, vətəndaşların ərizə və şikayətlərinə, müəssisə və təşkilatların məktub və müraciətlərinə vaxtında baxılmasına, istehsalatda baş vermiş bədbəxt hadisələrin təhqiqatının aparılmasına, öz fəaliyyəti ilə bağlı normativ sənədlərin layihələrinin hazırlanmasına yönəltmişdir.
2004-cü ildə məşğulluq xidməti orqanları tərəfindən 21662 nəfər münasib işlə təmin edilmişdir ki, bu da 2003-cü illə müqayisədə 3390 nəfər və ya 18,5 faiz çoxdur. Əhalinin, xüsusilə də gənclərin məşğulluğunun gücləndirilməsi məqsədi ilə həyata keçirilən tədbirlərin səmərəliliyi xeyli artırılmışdır. 2004-cü ildə respublikanın 55 şəhər və rayonlarında keçirilmiş əmək yarmarkalarında 6185 nəfər münasib iş yerləri ilə təmin edilmişdir ki, bu da 2003-cü illə müqayisədə 1836 nəfər və ya 42,2 faiz çox olmuşdur.
Nazirliyin fəaliyyətinin əsas istiqamətlərindən biri də əhalinin, xüsusilə də yaşlı nəslin, əlillərin, aztəminatlı ailələrin sosial müdafiəsinin gücləndirilməsi sahəsində dövlət siyasətinin formalaşdırılması və bununla bağlı bir sıra tədbirlərin həyata keçirilməsinin təmin edilməsi olmuşdur. “2003-2005-ci illər üçün Azərbaycan Respublikasında yoxsulluğun azaldılması və iqtisadi inkişaf üzrə Dövlət Proqramı”na və “Ərzaq Təhlükəsizliyi Proqramı”na əsasən, sosial yardım sisteminin təkmilləşdirilməsi və sosial yardımın ünvanlılığının təmin olunması istiqamətində əsaslı islahatların həyata keçirilməsi nəzərdə tutulmuşdur.
Əlillərin reabilitasiyası və cəmiyyətə inteqrasiyası sahəsində görülmüş işlər sırasında respublikamızda tibbi-sosial ekspertiza və reabilitasiya xidmətinin inkişafı, əlillərin reabilitasiya vasitələri ilə təchiz olunması, onlara protez-ortopediya xidməti göstərilməsi tədbirləri də uğurla həyata keçirilmişdir.
Əlillərin reabilitasiyasında bərpa mərkəzlərinin müstəsna rolu nəzərə alınaraq, nazirlik tərəfindən 2004-cü ildə belə mərkəzlərin işinin səmərəliliyinin yüksəldilməsinə və regionlar üzrə yeni bərpa mərkəzlərinin yaradılmasına xüsusi diqqət yetirilmiş, iki yeni reabilitasiya mərkəzi açılmışdır. Bundan əlavə, Əli Bayramlıda əlillərin bərpa mərkəzi istifadəyə verilmiş və ötən müddətdə burada 300 nəfərdən artıq əlilə bərpa müalicəsi xidməti göstərilmişdir.
Regionların sosial-iqtisadi inkişafı Dövlət Proqramının icrası olaraq, 2004-cü ildə Naxçıvan şəhərində Əlillərin bərpa mərkəzi tikilib istifadəyə verilmiş və onun açılışında Azərbaycan Prezidenti İlham Əliyev iştirak etmişdir. Göstərilən Proqrama uyğun olaraq, Sumqayıtda Əlillərin bərpa mərkəzi artıq istifadəyə verilmiş, Şəkidə isə yaxın zamanlarda istifadəyə verilməsi nəzərdə tutulmuşdur.
Nazir bildirmişdir ki, ötən il əlillər və şəhid ailələri üçün Bakının Sabunçu rayonunda 36 mənzilli, Göyçayda 21 mənzilli, Qubada 16 mənzilli, Mingəçevirdə 16 mənzilli və Lənkəranda 30 mənzilli yaşayış binaları tikilib istifadəyə verilmişdir. Ümumiyyətlə, 1997-ci ildən indiyədək nazirliyin sifarişi ilə əlillər və şəhid ailələri üçün 20 yaşayış binası və 169 fərdi yaşayış evi inşa olunmuş, bu kateqoriyadan olan 860 nəfərə paylanmışdır. Hazırda nazirliyin sifarişi ilə Bakının Yasamal rayonunda 36 mənzilli, Yevlaxda isə 16 mənzilli yaşayış binalarının tikintisi davam etdirilir, 2005-ci ildə respublikanın bir sıra rayon və şəhərlərində də belə yaşayış binalarının tikilib istifadəyə verilməsi nəzərdə tutulmuşdur.
Əlillərin həyat şəraitinin yaxşılaşdırılması və onların reabilitasiya imkanlarının genişləndirilməsi istiqamətində görülmüş işlərin ən əhəmiyyətlilərindən biri də onlara pulsuz nəqliyyat vasitələrinin verilməsi olmuşdur. Nazirlik tərəfindən 2004-cü ildə Gəncə avtomobil zavodundan 120 ədəd “OKA” markalı minik avtomobili alınmış və növbədə dayanmış Qarabağ və Böyük Vətən müharibəsi əlillərinə verilmişdir.
Kollegiya iclasında nazirliyin idarə və şöbə rəislərinin məruzələri dinlənilmiş, qarşıda duran vəzifələrin yerinə yetirilməsi ilə bağlı müvafiq göstərişlər verilmişdir.
Bölmənin digər xəbərləri
