İQTİSADİYYAT
Əmlak Məsələləri Dövlət Komitəsində cari ilin doqquz ayının yekunlarına həsr olunmuş müşavirə keçirilmişdir
Bakı, 18 oktyabr (AZƏRTAC). Əmlak Məsələləri Dövlət Komitəsində (ƏMDK) 2011-ci ilin doqquz ayında görülmüş işlər və qarşıda duran vəzifələrə dair geniş müşavirə keçirilmişdir.
Komitənin mətbuat xidmətindən AZƏRTAC-a verilən məlumata görə, müşavirədə ƏMDK-nın sədri Kərəm Həsənov bildirmişdir ki, Prezident İlham Əliyevin rəhbərliyi ilə əvvəlki illərdə olduğu kimi, cari ildə də həyata keçirilən davamlı tədbirlər nəticəsində ölkə iqtisadiyyatının bütün sahələrində artım templəri və sosial-iqtisadi inkişaf müşahidə edilmişdir.
Müşavirədə 2011-ci il yanvarın 27-də Prezident İlham Əliyevin tapşırığı əsasında Azərbaycan Respublikasının Korrupsiyaya qarşı Mübarizə üzrə Komissiyasının geniş iclasında verilmiş tapşırıqların icrası ilə bağlı komitə tərəfindən keçən dövr ərzində görülmüş işlər də müzakirə edilmişdir.
Qeyd edilmişdir ki, Əmlak Məsələləri Dövlət Komitəsinin fəaliyyətində dövlət əmlakının özəlləşdirilməsi və daşınmaz əmlak üzərində hüquqların qeydiyyatı sahələrində qanunçuluğun, vətəndaşların hüquq və azadlıqlarının daha səmərəli şəkildə təmin olunması, şəffaflığın artırılması, korrupsiya hallarına yol verilməməsi xüsusi prioritet təşkil etmişdir. Prosedurların asanlaşdırılması, müraciətlərə vaxtında baxılması, şikayətlərin araşdırılması və həlli istiqamətində əməli tədbirlər görülmüşdür.
Komitə sədri dövlət orqanlarında elektron xidmətlərin göstərilməsinin təşkili sahəsində tədbirlər haqqında Azərbaycan Prezidentinin müvafiq Fərmanının icrası üzrə görülmüş işlərdən də danışmışdır. Bildirmişdir ki, modern və çevik idarəetmənin, fəzliyyət prosesində şəffaflığın və səmərəliliyin təmin edilməsi məqsədi ilə Azərbaycan Prezidentinin dövlət orqanlarında elektron xidmətlərin göstərilməsi sahəsində verdiyi tapşırıqların icrası daim diqqət mərkəzində saxlanılmış və ardıcıl tədbirlər görülmüşdür.
Qeyd edilmişdir ki, müəssisələrdə institusional yeniləşmə sahəsində müvafiq təhlillər aparılmışdır. Araşdırmalar nəticəsində dövlət müəssisələrinin sağlamlaşdırılması və restrukturizasiyası, özəlləşdirilmiş müəssisələrə dəstək tədbirlərinin göstərilməsi, müəssisələrin müflis elan olunması yolu ilə özəlləşdirilməsi, dövlət əmlakının idarəetməyə verilməsi ilə bağlı bir sıra təkliflər hazırlanmışdır.
Diqqətə çatdırılmışdır ki, bu il dövlət mülkiyyətinin özəlləşdirilməsi və icarəyə verilməsi, daşınmaz əmlak üzərində hüquqların qeydiyyat sisteminin, habelə reyestrinin aparılmasının təkmilləşdirilməsi və inkişaf etdirilməsi, daşınmaz əmlakın vahid dövlət kadastrı və daşınmaz əmlakın istifadəsinə dair 20-yə yaxın normativ hüquqi sənədin layihələri hazırlanmışdır. Bunlardan 4 sənəd layihəsi təsdiq edilmişdir.
Məlumat verilmişdir ki, ötən müddətdə respublika üzrə 110 minə yaxın daşınmaz əmlak obyekti üzərində mülkiyyət hüquqları qeydiyyata alınmışdır.
Daşınmaz əmlakın qeydiyyatı layihəsinə dair Azərbaycan Respublikası ilə Beynəlxalq Yenidənqurma və İnkişaf Bankı arasında kredit sazişinin icrası ilə bağlı tədbirlər davam etdirilmişdir.
Hesabat dövründə daşınmaz əmlakın vahid kadastrının aparılması, ünvan reyestri və daşınmaz əmlak obyektlərinə ünvan verilməsi sahələrində müəyyən edilmiş tədbirlər həyata keçirilmişdir. Respublika ərazisində yeni formalaşdırılan irihəcmli daşınmaz əmlak obyektlərinin inşası üçün nəzərdə tutulmuş ərazilərin kadastr planları hazırlanmışdır. Daşınmaz əmlak obyektlərinə kadastr planlarından çıxarışlar verilmişdir. Dövlət mülkiyyətində olan daşınmaz əmlak obyektlərinin elektron kadastr məlumat bazasının yaradılması istiqamətində tədbirlər görülmüşdür. Azərbaycan Respublikası Hökuməti ilə Almaniya Federativ Respublikası Hökuməti arasında imzalanmış “Maliyyə əməkdaşlığı haqqında” sazişə əsasən, Əmlak Məsələləri Dövlət Komitəsi ilə Almaniyanın KfW Bankı arasında bağlanmış müqaviləyə uyğun olaraq Gəncə və Şəkidə “Kadastr və daşınmaz əmlakın qeydiyyatı” layihəsinin ilkin mərhələsi başa çatdırılmışdır. İlkin mərhələdə Şəki rayonunda və Gəncə şəhərində seçilmiş ərazilərdə sistematik kadastr ölçmə işləri aparılmışdır. Bu ərazilərdə yerləşən, mülkiyyət formasından asılı olmayaraq bütün növ daşınmaz əmlakın və ərazinin kadastr xəritələri hazırlanmışdır. Bakı şəhərinin Nəsimi, Nizami, Xətai və Nərimanov rayonlarının ünvan reyestri tərtib edilmiş və ünvan xəritələri hazırlanmışdır. “Azərbaycan Respublikasının Əmlak Məsələləri Dövlət Komitəsi və Statens Kartverk-Norveç Xəritəçəkmə Təşkilatı arasında “Azərbaycanda ünvan reyestrinin informasiya sisteminin yaradılması” layihəsinin icrası ilə bağlı tədbirlər görülür.
Müşavirədə məlumat verilmişdir ki, vətəndaşlardan komitənin 193 nömrəli “Qaynar telefon xətti”nə 400-ə, rəsmi internet səhifəsi vasitəsilə isə 200-ə yaxın müraciət daxil olmuşdur. Daxil olan müraciətlərin operativ cavablandırılması təmin edilmişdir.
Müşavirənin sonunda komitə sədri bir sıra tapşırıqlar vermişdir.
Komitəyə daxil olan müraciətlərə, ərizə və şikayətlərə mahiyyəti üzrə baxılmasında operativliyin artırılması, süründürməçilik hallarına yol verilməməsi, ictimaiyyətlə əlaqələrin gücləndirilməsi, informasiya işinin nəzarətdə saxlanılması, ictimai məlumatlandırma və maarifləndirmə tədbirlərinin daha da genişləndirilməsinin vacibliyi qeyd edilmişdir.