Ərdoğan Karakuş: Can Azərbaycanı sevmək azdır, onun varlığını ürəklərdə yaşatmaq borcumuzdur
Ankara, 30 may, AZƏRTAC
Azərbaycanın müstəqilliyindən və çoxşaxəli inkişafından çox məmnunuq. Şükürlər olsun ki, bu gözəl günləri yaşamaq bizlərə nəsib oldu. Azərbaycan Xalq Cümhuriyyətinin yaranmasının ildönümünün Ankarada təntənə ilə qeyd olunması hər bir türk üçün sevinc qaynağıdır. Can Azərbaycanı sevmək azdır, onun varlığını ürəklərdə yaşatmaq könlümüzün borcudur.
Bu fikirləri AZƏRTAC-a açıqlamasında Türkiyə Təqaüddə olan Zabitlər Dərnəyinin (Türkiye Emekli Subaylar Derneği-TESUD) sədri Ərdoğan Karakuş ifadə edib.
Ümummilli lider Heydər Əliyevin “Bir millət, iki dövlət!” kəlamını xatırladan ehtiyatda olan zabit Ərdoğan Karakuş deyib: “Tarixlərə nur saçan Azərbaycan-Türkiyə qardaşlığı gələcək nəsillərə örnəkdir. Birliyimiz və həmrəyliyimiz Türk Dövlətləri Təşkilatı kimi əzəmətli bir qurumun yaranmasını təmin edib. Budur mübarizəmizin mənası: Bir olaq, diri olaq, bütün türk dövlətləri ilə birlikdə olaq!”
Müzəffər Ali Baş Komandan İlham Əliyevin rəhbərliyi ilə qəhrəman Azərbaycan Ordusunun İkinci Qarabağ müharibəsində qazandığı parlaq Qələbə sayəsində işğaldan azad olunmuş ərazilərdə aparılan yenidənqurma və bərpa prosesini Qarabağa böyük qayıdışın təntənəsi kimi dəyərləndirən Ərdoğan Karakuş “Bu Zəfər birliyimizin təntənəsidir. Azərbaycan böyük siyasi iradə ilə vandalların dağıdıb məhv etdiyi hər şeyi yenidən dirçəldir. Parlaq hərb Zəfəri ilə otuz illik işğala son qoyub öz yurduna sahib olan Azərbaycan qurub yaratmaqla da nələrə qadir olduğunu bütün dünyaya nümayiş etdirməkdədir”, - deyə fikirlərini davam etdirib.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
