Ərdoğanın rəhbərliyi dönəmində Türkiyənin dünyadakı yeri və əhəmiyyəti yüksəlməkdədir
Bakı, 2 may, AZƏRTAC
Cənubi Qafqaz və ətraf region üçün son 3 ildə müsbətə doğru həlledici, əhəmiyyətli dəyişikliklər baş verib. Bunun mərkəzində isə Azərbaycan və Türkiyə dayanır. Son illərdə ölkələrimiz arasında münasibətlərin inanılmaz dərəcədə yüksək səviyyəyə çatmasında, qardaşlıq bağlarının durmadan bərkiməsində hər iki dövlət başçısının əməyi danılmazdır. Prezidentlər İlham Əliyev və Rəcəb Tayyib Ərdoğanın xalqlarımızın dərin köklərə əsaslanan qardaşlığını qoruması, daha da möhkəmləndirməsi nəinki Türkiyə və Azərbaycanda, regionda və dünyada diplomatik, siyasi, iqtisadi, mədəni sahələrdə dəyişiklikləri özündə ehtiva edir. Ümumiyyətlə, Azərbaycan və Türkiyə tarixində hərtərəfli əlaqələr, qardaşlıq münasibətləri ən yüksək səviyyəyə məhz Prezident İlham Əliyevin və Prezident Rəcəb Tayyib Ərdoğanın hakimiyyəti dönəmində çatıb.
Bu fikirləri AZƏRTAC-a açıqlamasında Azərbaycan Gənclərinin Avropaya İnteqrasiyası Təşkilatının İdarə Heyətinin üzvü, ictimai fəal Nərgiz Xələf söyləyib.
N.Xələfin sözlərinə görə, Azərbaycan üçün ən önəmli məqamlardan biri odur ki, Qarabağ erməni işğalından azad olunanadək Türkiyə Azərbaycanın haqq səsini beynəlxalq tribunalarda hər zaman səsləndirdi və siyasi dəstəyini əsirgəmədi. 2020-ci ildə İkinci Qarabağ müharibəsi zamanı isə bu dəstək real bəhrəsini verdi. Mənəvi, psixoloji, milli, hərbi, diplomatik gücü Qarabağı 30 ildən sonra geri qaytarmağa yetərli olan Azərbaycan beynəlxalq səviyyədə Türkiyə kimi qardaş ölkənin dəstəyini aldı və bu, onun gücünə güc qatdı. Nəticədə bütün dünyaya örnək olan dövlətlər arasında qardaşlıq nümunəsi ərsəyə gəldi.
“Bundan əlavə, iqtisadi sahədə Azərbaycan-Türkiyə əməkdaşlığı da təkcə hər iki ölkə üçün deyil, ümumilikdə Avropa üçün əhəmiyyətlidir. TANAP və TAP kəmərləri vasitəsilə Azərbaycan qazının Avropaya çatdırılmasında Türkiyə mühüm rol oynayır. Artıq Türkiyə sutkada 160 milyon kubmetrdən çox maye qazın emalını həyata keçirməyə qadirdir, bu isə ildə 50 milyard kubmetr qaz deməkdir. Türkiyə faktiki olaraq qaz habı kimi çıxış edir və Avropanın enerji təhlükəsizliyinə töhfəsini verir.
“Türkiyənin gücü bizim gücümüzdür” fikrindən çıxış edərək bu məsələ də qeyd olunmalıdır ki, Ərdoğanın rəhbərliyi dönəmində Türkiyənin dünyadakı yeri möhkəmlənməkdə, əhəmiyyəti artmaqdadır. Ən önəmli məqam isə ondan ibarətdir ki, Türkiyə Prezidenti ölkəsinin müstəqil xarici siyasət həyata keçirməsini təmin edir. Bugünkü qarışıq dünyada söylənilən bu məqam bir xalq, bir millət, bir dövlət üçün ən önəmli məsələlərdən biridir.
Türkiyənin beynəlxalq problemlərin (İsrail-Fələstin, Rusiya-Ukrayna, Suriya, Liviya münaqişələri) həllinə töhfə məsələsində ən mühüm ölkə hesab olunur. Bundan başqa, Türkiyə Ukraynada gedən müharibə səbəbindən bir çox ölkələrin ərzaq çatışmamazlığına məruz qalmasının qarşısını (Taxıl razılaşması) alan aktor kimi çıxış etdi”, - deyə ictimai fəal qeyd edib.
Digər mühüm məqamlardan birinin terror bəlası olduğunu diqqətə çatdıran N.Xələfin sözlərinə görə, terrorla mübarizə aparan Türkiyədə PKK və digər terror təşkilatları ilə mübarizə davamlı olaraq aparılır. Bu mübarizə sayəsində Orta Şərqi terror zonasına çevirmək istəyən güclərin işində əngəllər yarandı. Qərbdə və Şərqdə Türkiyənin gücünün hiss olunmasında Ərdoğanın rolu danılmazdır.
“Azərbaycan vətəndaşı və bir türk olaraq, Türk dünyasında dirçəliş, yaxınlaşma, get-gedə öz soyuna sahiblənmə prosesinin sürətlənməsini müşahidə etmək məni xoşbəxt edir. Bu məsələdə Azərbaycanın rolu öz yerində, o cümlədən Ərdoğanın simasında Türkiyənin rolu inanılmaz böyükdür. Bu, hətta Türkiyə daxilində mədəni-mənəvi təbliğatın səviyyəsində də hiss olunur.
Aprelin 29-da Türkiyədə keçirilən “TEKNOFEST” festivalında verilən mesajlar həm də Türk dünyası üçün yol xəritəsi oldu. Azərbaycan Prezidenti İlham Əliyevin tədbirdə çıxışı zamanı “Quruda “TOGG”, suda “Anadolu”, səmada “Kızılelma”. Budur bugünkü Türkiyə!” ifadəsi dostlarımıza əmin-amanlıq, düşmənlərimizə isə qorxu mesajı idi. Çünki Türkiyə bizik, biz isə Türkiyə. Bu nümunəvi qardaşlığı qorumaq, ona sahib çıxmaq gərəkdir. Ümid edirik ki, xalq mayın 14-də ölkədə keçiriləcək prezident seçkilərində Türkiyənin gücünə, dünyadakı sanbalına, gündən-günə artan çəkisinə səs verəcək”, - deyə Nərgiz Xələf fikirlərini yekunlaşdırıb.
Bölmənin digər xəbərləri
