Ərəb Liqası Misirin təklifinə əsasən Liviyada vəziyyətlə bağlı təcili iclas çağıracaq
Qahirə, 20 iyun, AZƏRTAC
Ərəb Dövlətləri Liqası Misirin təklifinə əsasən Liviyadakı vəziyyətlə bağlı Xarici İşlər nazirləri səviyyəsində təcili virtual iclas çağıracaq.
AZƏRTAC xəbər verir ki, bunu təşkilatın baş katibinin müavini Hüssam Zəki bildirib. O qeyd edib ki, hazırda Ərəb Liqasına sədrlik edən Omanla məsləhətləşmələr aparılır və iclasın gələn həftə keçiriləcəyi nəzərdə tutulur. Qahirənin təklifini ərəb ölkələrinin əksəriyyəti dəstəkləyib.
Bir neçə gün əvvəl Misir Prezidenti Əbdülfəttah əl-Sisi liviyalı feldmarşal Xəlifə Həftar və Liviya parlamentinin spikeri Aquila Saleh ilə keçirdiyi görüşdən sonra Qahirənin sülh planını açıqlamışdı. Planda silahlı münaqişə tərəfləri arasında dərhal atəşkəs əldə edilməsi, sülh danışıqlarına başlanılması nəzərdə tutulur. Misir Prezidentinin elan etdiyi Qahirə Bəyannaməsini BMT, Fransa, İtaliya, Almaniya və ərəb ölkələrinin əksəriyyəti dəstəkləyib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
