Erməni icmasının müraciətlərə mənfi cavab verməsinin səbəbləri – Politoloq şərhi
Bakı, 29 mart, AZƏRTAC
İkinci Qarabağ müharibəsindən sonra Azərbaycan Xankəndi və ətraf ərazilərdə yaşayan erməni əsilli vətəndaşların reinteqrasiyası prosesini gündəmə gətirdi. Həmin məqsədlə əvvəlcə onlara müxtəlif səviyyədə müraciətlər ünvanlanmağa başlandı. Qarabağda aparılan yenidənqurma və bərpa işləri də həmin məsələdə vacib element kimi çıxış edir. Dövlətimizin başçısı isə bütün müstəvilərdə çıxışı zamanı həmin ərazilərdə yaşayan ermənilərə səslənərək onların Azərbaycan Respublikasının vətəndaşları olduğunu bildirib. Hətta bu aralar gündəlik tələbat ehtiyaclarını ödəyə bilməyən erməni əsilli vətəndaşlara müvafiq dəstək də göstərildi. Lakin erməni icması hazırda ərazidə qanunsuz fəaliyyət göstərən terrorçu bir xuntanın əlində girova çevrilib. Martın 1-də icmalar arasında keçirilən görüşdən sonra Azərbaycan ikinci dəfə erməni icmasına növbəti görüşün Bakıda keçirilməsini təklif etdi. İki müraciətə də mənfi cavab verildi.
Bu fikirləri AZƏRTAC-a açıqlamasında politoloq Amid Əliyev söyləyib.
Politoloq müraciətlərə mənfi cavab verilməsinin səbəbini onların ciddi təzyiq və hədə-qorxu altında olmaqları ilə izah edib: “Qondarma rejimin rəhbərləri Azərbaycana qarşı təhdid ritorikasını artırdığı, ərazidə yeni istehkamlar qurulduğu bir vaxtda müsbət cavabı gözləmək bir qədər məntiqsiz olardı. Bu işdə Ermənistanın siyasi hakimiyyəti ilə yanaşı, ziddiyyət və kolliziyaların yaranmasında maraqlı olan dövlətlər və dairələr də var. Fransa, İran və Rusiya siyasi dairələri heç də bu yaxınlaşmaya isti yanaşmırlar. Hər vəchlə iki icma arasında münasibətlərin normallaşmasını və sonda sülh sazişinin imzalanmasını əngəlləmək istəyirlər. Buna cavab olaraq Azərbaycan öz vətəndaşlarını siyasi proseslərin qurbanına çevirmək istəmir. Sülhün əldə olunmasında və təhlükəsizliyin təmin edilməsində vətəndaşların həyatını danışıq mövzusuna çevirmir. Bu, Azərbaycanın dövlət siyasətinin əsasında humanizm, insan hüquqları, multukulturalizm kimi ümumbəşəri prinsiplərin dayandığını göstərir. Lakin Ermənistanın siyasi hakimiyyəti, qondarma rejimin funksionerləri və bəzi ərazidəki missionerlər həmin planların icrasına mane olur. Xüsusilə Laçın yolunda ictimai nəzarətin olması və alternativ yollara da nəzarətin həyata keçirilməsi onlarda ciddi narahatlıq və qorxu hisslərini daha da aktiv edib. Hər yerdən əlləri üzülən erməni təxribatçıları tələyə düşdüklərini anlayaraq rəsmi Bakı ilə danışıqlara bilərəkdən getmək istəmirlər. Belə olan halda Azərbaycan həmin istiqamətdə aparılan işlərə mane olan amilləri qısa müddətdə aradan qaldırmalı olacaq”.
Bölmənin digər xəbərləri
