ERMƏNİ TƏBLİĞAT MAŞINI YENƏ DƏ ƏSASSIZ MƏLUMATLAR YAYIR
İraq müharibəsindən sonra regionda coğrafi-siyasi vəziyyətin dəyişəcəyini əvvəlcədən görən Azərbaycan və Gürcüstan bu məsələdə ABŞ-ı birmənalı dəstəklədikləri halda, ölkəsinin ikibaşlı oyununun səhv olduğunu anlayan erməni təbliğat maşını yenə də simasızlıq göstərərək, belə bir rəy yaratmağa çalışır ki, guya Birləşmiş Ştatların dövlət katibindən tutmuş Dövlət Departamentinədək bütün rəsmiləri hadisələrin bu mürəkkəb dövründə iş-güclərini atıb Ermənistanın problemləri ilə məşğul imişlər.
Ermənilərin “Noyan Tapan” informasiya agentliyinin “Vaşinqton Türkiyəni Ermənistanın blokadasına son qoymağa çağırır” başlığı altında yaydığı xəbər bunu bir daha təsdiq edir. Məsələ bundadır ki, “Azadlıq” radiosunun ABŞ Dövlət Departamentinin naməlum hesabatına istinadən yaydığı bu məlumat tamamilə əsassızdır. ABŞ-ın dövlət katibi Kolin Pauellin Türkiyə rəsmi dairələri ilə görüşündə Ermənistanla nəqliyyat dəhlizinin açılması məsələsinin müzakirə olunması barədə deyilənlər də ağ yalandır.
AZƏRTAC aprelin 2- də keçirilmiş həmin görüşdən sonra ABŞ Dövlət Departamentinin xətti ilə yayılmış bütün məlumatları araşdırmış, Azərbaycanın Vaşinqtondakı və Birləşmiş Ştatların Bakıdakı səfirlikləri ilə əlaqə saxlamışdır. Məlum olmuşdur ki, bu dövrdəki məlumatlarda Ermənistanın heç adı da çəkilmir. Aprelin 5- də “Vaşınqton Fayl”dakı geniş hesabatda bir məsələ xüsusi vurğulanmışdır: “Türkiyə özünün demokratik təcrübəsi və ənənələri ilə İraqda qurulacaq yeni hökümətə örnək və müsəlman ölkəsində demokratik cəmiyyət formalaşdırılmasına nümunə ola bilər”.
Bölmənin digər xəbərləri
