Ermənistanda bir hərbçi öldürülüb, biri isə ağır yaralanıb
Tbilisi, 13 dekabr, AZƏRTAC
Ermənistanda hərbçilərlə mülki şəxslər arasında əlbəyaxa dava olub. Nəticədə bir hərbçi zabit öldürülüb.
AZƏRTAC Ermənistan mətbuatına istinadən xəbər verir ki, hadisə İrəvandakı Vazgen Sarkisyan adına hərbi universitetin yaxınlığında baş verib. Müdafiə Nazirliyinin 5 zabiti ilə 3 nəfər mülki şəxs arasında mübahisə olub. Sonra isə hərbçilərlə mülki şəxslər dava ediblər.
Mübahisəyə mülki şəxsin hərbçilərə olan pul borcunu qaytarmamasının səbəb olduğu bildirilir. Həmin şəxs hərbçilərin ünvanına təhqiramiz ifadələr işlədib. Bundan sonra bıçaqla baş leytenant Gevorq Marqaryan və David Sayadyana ağır bədən xəsarəti yetirib. Təcili yardım maşını onları tibb mərkəzinə çatdırıb. Sonuncu xəstəxanada ölüb.
Hadisə ilə əlaqədar cinayət işi başlanıb. Hadisənin başvermə şəraitinin tam aydınlaşdırılması üçün ilkin araşdırma aparılır. Müdafiə Nazirliyinin mətbuat katibi Aram Torosyan hərbi qulluqçularla bağlı təfərrüatları açıqlamaq istəməyib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
